Kalpasan ti pannakaarestar ni dati a presidente Rodrigo Duterte iti inkaso kenkuana ti International Criminal Court (ICC) a krimen kontra iti sangkatawan, naipan a dagus iti The Hague iti Netherlands tapno sadiay a maisaklang ket sanguenna ti kasona.
Nailugan iti pribado nga eroplano ti dati a presidente ket naibiahe manipud iti Manila iti 11:03 ti rabii idi Martes, Marso 11, 2025, para iti innem nga oras a flight nga agpa-Dubai sa kalpasanna maituloy ti biaheda nga agtunged iti Rotterdam, The Netherlands.
Naidardaras ti pannakairuar ni Duterte iti hangar iti Villamor Air Base tapno mailugan iti eroplano nga inabangan ti ICC. Naisayangkat dagitoy babaen ti Philippine National Police (PNP) Criminal Investigation and Detection Group (CIDG) nga indauluan da hepe ti CIDG Maj. Gen. Nicolas Torre ken pannakangiwat ti CIDG Brig. Gen. Jean Fajardo.
Kinuna met ni Vice President Sara Duterte a napuersa a naipan iti The Hague ti amana. Segun kenkuana, “naipaidaman kadagiti pundamental a karbenganna” ti dati a presidente.
Umdas ti imbinglay dagiti kameng ti gabinete iti pannakaarestar ni Duterte -- Malakanyang
Kabayatanna, kinuna met ni Chief Presidential Legal Counsel Juan Ponce Enrile a saan a rebbengna a mapabasol ti gobierno ti Filipinas iti agdama a legal a parikut ni dati a presidente Duterte. "Ti legal a parikutna ket gapuanan dagiti linteg nga ipatpatungpal ti International Criminal Court.” (MB)
