Kinuna ti Armed Forces of the Philippines (AFP) itoy nga aldaw, Marso 12, a saan a pudno dagiti pattapatta nga adda riribuk iti militar manipud kadagiti soldado a nasakit ti nakemda iti pannakaarestar ni dati a presidente Rodrigo Duterte.
Impaganetget ni Col. Francel Margareth Padilla, pannakangiwat ti AFP, nga agtalinaed a propesional ken non-partisan dagiti soldado, ken agpokusda iti kangrunaan nga annongenda a mangsalaknib iti seguridad ken mangsalimetmet iti kinatalged ti pagilian.
Kinuna ni Padilla a ti pannakaarestar ti dati a presidente ket paset ti pannakaipakat ti linteg, ket saan a direkta a sakup ti AFP.
Innayon ni Padilla nga awan ti pagbatayan iti pattapatta a riribuk iti AFP, ket agtalinaedda ketdi a natibker ken propesional, ken naikumit iti chain of command ken demokratiko nga institusion ti Filipinas. (Martin Sadongdong/Manila Bulletin//Lito Hilidon/Bannawag)
