Imparit ti Department of Public Works and Highways (DPWH) dagiti trak nga agdagsen iti 15 a tonelada a bumallasiw iti Buntun Bridge iti Siudad ti Tuguegarao, Cagayan, kalpasan a naduktalan dagiti inheniero dagiti nagbirri ken nagungap a deck slab ti rangtay.
Segun iti DPWH-Cagayan 3rd District Engineering Office, masapul daytoy a pannakaiparit tapno maliklikan ti ad-adda a panagkapuy ti 1.3-kilometro a rangtay iti Cagayan River.
Maibalakad kagiti nadagsen a lugan nga usarenda ti Maharlika Highway iti Isabela kas alternatibo a pagdalanan.
Impasigurado ti DPWH iti publiko a kitkitaen a nalaing dagiti inheniero ti rangtay bayat nga ad-adalenda no ania dagiti masapul a matarimaan wenno mapatibker iti rangtay.
Umdas ti imbinglay dagiti kameng ti gabinete iti pannakaarestar ni Duterte -- Malakanyang
Nabangon idi 1960, namin-adun a natarimaan ti Buntun Bridge, ngem parikut latta ti panagdaan ti rangtay ken ti umad-adu a lumaslasat ditoy.
Kiniddaw dagiti autoridad ti kooperasion ti publiko, ket impaganetgetda a ti panangsukimatda iti rangtay ti pagibasaranda iti masapul nga aramidenda tapno agtalinaed a natibker ken natalged ti rangtay. (Trixee Rosel/Manila Bulletin//Lito Hilidon/Bannawag)
