Baonen ti European Union (EU) ti maysa nga Election Observation Mission (EOM) iti Filipinas tapno agpaliiw iti maangay a midterm elections itoy a Mayo.
Daytoy ti umuna a gundaway a mangibaon ti EU iti agpaliiw iti eleksion ti Filipinas.
Inkeddeng ti High Representative/Vice President ti European Commission (HR/VP) a ni Kaja Kallas a mangibaon iti EOM gapu iti awis ti Commission on Elections (Comelec).
Kinuna ti EU a maysa nga addang daytoy para iti natibtibker a relasion ti Filipinas ken ti EU.
Pannakaimprenta dagiti balota, manamnama a malpas itoy a lawas
Dinutokan ni Kallas ni Marta Temido, kameng ti European Parliament, a kas chief observer.
Segun iti EU, ti EOM ti mangipaay iti komprehensibo, agwaywayas, ken awan idumdumana a panangsukimat iti proseso ti eleksion maibatay iti estandarte iti international ken regional a demokratiko nga eleksion.
Karbengan ti EOM nga adalen ti proseso ti eleksion maitunos iti legal nga istruktura ti Filipinas, kasta met iti international ken regional standard a pinirmaan ti Filipinas maipapan iti demokratiko nga eleksion.
Mangiruar ti EOM iti preliminary statement ken mangangay iti press conference kalpasan ti eleksion. Iparangda ti pinal a report, agraman ti singasingda kadagiti sumaruno nga eleksion, kadagiti maseknan kalpasan ti entero a proseso ti eleksion. (Betheena Unite/Manila Bulletin//Lito Hilidon/Bannawag)
