Nagkedked ti Pasig City Regional Trial Court (RTC) Branch 159 idi Marso 12, iti kiddaw a pannaka-house arrest wenno panakayakarna a maidetine iti mismo a pagtaenganna nga indatag ni pastor ti Kingdom of Jesus Christ (KOJC) Apollo Quiboloy gapu iti kinakurang ti merito.
Impaulog ni Acting Presiding Judge Rainelda Estacio-Montesa ti pammilin kalpasan a nagkiddaw ni Quiboloy iti house arrest gapu iti medikal ken humanitarian a rason. Kinuna ti korte nga awan ti pagbatayan daytoy a kiddaw iti Rules of Criminal Procedure wenno iti Konstitusion.
Kiniddaw ni Quiboloy a ma-house arrest iti Garden of Eden Resort iti Siudad ti Davao, iti KOJC Compound iti Siudad ti Quezon, wenno iti Siudad ti Tagaytay.
Segun iti korte, saan nga umdas a rason ti posible a panagsalog ti salun-at ni Quiboloy bayat ti pannakaipupokna, tapno mapatgan ti house arrest. Innayon ti korte a mabalin a mataming ti salun-at ni Duterte iti medikal a pasilidad iti uneg ti pagbaludan.
Camille Villar: Nasken a marisut ti parikut iti umad-adu nga agsiksikog a tin-edier iti pagiliantayo
Inlawlawag ti korte a saan nga agkanaig ti house arrest ken medical access, ta kabaelan ti klinika ti Bureau of Jail Management and Penology (BJMP) a taripatuen ti salun-at ni Quiboloy, ken kadagiti klinika nga ituding ti korte.
Kinuestionar ti prosekusion ti kinaumisu ti pannaka-house arrest ni Quiboloy kadagiti lugar ti KOJC, idinto nga idiay a napasamak dagiti maipagarup a panaglabsingna iti linteg.
Kalpasan ti naannad a panangtingiting kadagiti argumento ti agsinnumbangir a partido, inkeddeng ti Korte a saan a patgan ti petision para iti house arrest nga indatag ti akusado gapu iti kinaawan ti pagibasaran. (Richielyn Canlas/Manila Bulletin//Lito Hilidon/Bannawag)
