Impaganetget ni Camille Villar a kasapulan a mapapigsa wenno manayonan ti suporta ti gobierno kadagiti babbai, ubbing, ken nataengan (senior citizen) bayat ti pannakisarsaritana kadagiti maseknan a sektor iti Amianan a Luzon itay arinunos ti lawas.
Iti panagsaritana bayat ti selebrasion ti Women’s Month nga idauluan ni Avanche Isabelina iti Luna, Isabela, inkari ni Villar nga ituloyna ti mangitandudo iti women empowerment ken maternal and reproductive health, kasta met ti mental health awareness.
“Masapul a nasalun-attayo no aganaktayo gapu ta no nasalun-at ni mommy, nasalun-at met ni baby. Saan laeng a dayta, taripatuentayo dagiti annakyo,” kinunana.
No maikkan iti gundaway nga agserbi a senador kalpasan ti eleksion ti Mayo 2025, kuna ni Villar nga ipangrunana dagiti proyekto a mangipasigurado iti umno nga edukasion para kadagiti pre-school children wenno dagiti ubbing a di pay sumrek iti pagadalan.
Pannakaimprenta dagiti balota, manamnama a malpas itoy a lawas
“Siguraduentayo a makapagbasada. Siguraduentayo a masursuruanda a nasayaat sakbay a sumrekda iti eskuela ken maited ti amin a benepisio a para kadakuada,” innayonna.
Dua a terminon a nagserbi kas diputado, indauluan ni Villar ti “Handog Karunungan” book donation drive sadiay Las Piñas. Kinunana a planona nga ituloy daytoy nga adbokasiana, ket panggepna ti mangipaay kadagiti ubbing nga agbasbasa kadagiti libro ken dadduma pay nga alikamen iti pagadalan a makatulong iti panagadalda.
Kitkitaen met ni Villar ti posible a pannakanayon dagiti benepisio dagiti senior citizen tapno adda makaanay a gastuenda para kadagiti agasda.
