Mapilaan kadagiti kaso a kriminal ni Honeylet Avanceña, kabbalay ni dati a presidente Rodrigo Duterte, gapu iti mapapati a panangdangranna iti maysa a babai a polis a kameng ti Special Action Force (SAF) kabayatan ti pannakayakar ni Duterte iti eroplano a mangibiahe kenkuana iti Netherlands idi Martes, Marso 11.
Segun ken ni Brig. Gen. Jean Fajardo, spokesperson ti Philippine National Police (PNP), naitaray ti babai a polis iti maysa a medical facility kalpasan a nagsagaba daytoy ti sugat iti mugingna.
“Nasugatan ti ulo ti polis ket mangipila kadagiti kaso. Adda video-tayo a mangpaneknek a pudno a dinangran ni Ms Honeylet ti polis babaen ti cellphone-na,” kinuna ni Fajardo.
Maysa kadagiti kaso a maipila ket direct assault.
Nayon a suporta para kadagiti babbai, ubbing nga agbasbasa, ken nataengan, ilunglungalong ni Camille Villar
Nairaman ti nasugatan a polis iti grupo dagiti babbai a polis a nangipaay iti seguridad ken ni Avanceña ken ti balasangna a ni Kitty iti Villamor Airbase iti baet ti panagdudupudop gapu iti mapapati a panaggandat dagiti kakadua ni Duterte a manglapped kadagiti autoridad iti pannakailugan ti dati a presidente iti eroplano.
Kadua ni Fajardo ni Maj. Gen. Nicolas Torre III, direktor ti Criminal Investigation and Detection Group (CIDG) kabayatan ti pannakaiserbi ti arrest warrant manipud iti ICC kalpasan ti isasangpet ni Duterte iti Ninoy Aquino International Airport (NAIA) Terminal 3.
Pinasingkedan ni Fakardo dagiti berbal a panagabuso a sinagaba ni Torre ken dagiti sumagmamano a polis manipud kadagiti kakadua ni Duterte.
“Nasagrapmi amin a panangilunod, amin a pananginsulto ngem nagtalinaed a napakumbaba ken natanang dagiti polis,” kinuna ni Fajardo.
“Ket para iti rekord, awan ti nadangran kadakuada (dagiti Duterte),” innayonna.
Kabayatanna, maipapan iti sumagmamano a polis nga agipaspaskil iti social media iti pangtada nga agikkatda a kas polis wenno babbabalawenda iti pannakaarestar ni Duterte, impalagip ni Fajardo kadagiti amin a polis nga agtalinaedda nga apolitical.
“Adda dagiti ethical standards ken norms iti ikub ti PNP maipapan iti panangyebkas iti kapanunotan nangruna ta pagaammotayo amin a ti PNP ket maysa nga apolitical ken non-partisan nga organisasion,” kinuna ni Fajardo.
“Respetarenmi ti kapanunotanda ngem iti panangiwaragawagda kadagitoy a kapanunotan, adda dagiti limitasion no isuda ket parte pay met laeng ti PNP. Karbenganda a yebkas ti kapanunotanda ngem no kamengda pay met ti PNP, rumbeng a surotenda ti sumagmamano nga annuroten iti panangyebkas kadagiti sentimientoda iti social media,” kinuna ni Fajardo. (Aaron Recuenco/MANILA BULLETIN)
