Impalgak ti Department of Justice (DOJ) ita nga aldaw, Marso 13, nga idarumda dagiti pannakabagi ti linteg a nangabuso iti illegal a drug war ni dati a presidente Rodrigo R. Duterte.
Kinuna ni Assistant Secretary ti DOJ Jose Dominic F. Clavano IV nga ur-urnongenda dagiti ebidensia tapno masigurado a sumango iti pangukoman dagiti maidarum tapno maipakat ti due process, ket madusada no mapaneknekan a nagbasolda.
Daytoy ti impanamnama ni Clavano kalpasan ti pannakaarestar ni Duterte gapu iti crimes against humanity mainaig kadagiti extrajudicial killing (EJK) a mapapati a naaramid bayat ti panagakemna a kas presidente.
Impaganetget ni Clavano a ti pannakaarestar ni Duterte ket dina kaipapanan nga insuko ti Filipinas ti panagwaywayasna a kas maysa a pagilian, wenno panangaklon a saan nga agan-andar ti sistema ti hustisia iti pagilian.
PNP: Honeylet Avanceña, makasuan gapu iti panangdangranna iti babai a polis
Inlawlawag ni Clavano a nakitinnulong ti Filipinas iti International Criminal Police Organization (Interpol) iti panangiserbida iti warrant of arrest nga impaulog ti International Criminal Court (ICC). (Jeffrey Damicog/Manila Bulletin//Lito Hilidon/Bannawag)
