Nasamsam dagiti kameng ti Philippine Drug Enforcement Agency (PDEA) idi Marso 12 ti agbalor iti agarup ₱3.4 a milion a mapapati a shabu kalpasan a nakemmeg ti maysa a drug suspect iti naisayangkat a buy-bust operation iti Lanao del Sur.
Nakemmeg ti suspek, ni alias "Angko," 35, residente ti Barangay Kanyugan Papandayan, Siudad ti Marawi a mangipatpataray iti panaglako iti illegal a droga, saan la nga itoy a siudad no di pay ket iti kabangibang a probinsia ti Lanao del Sur.
Kinuna ni Gil Cesario P. Castro, regional director ti PDEA, nga insayangkatda ti buy-bust gapu iti natakuanda kalpasan ti panangsiim ken panagkalapda iti impormasion mainaig iti lugar.
Malaksid iti 500 a gramo a shabu a nailemmeng iti nagalutan a plastik a selopin a nabungon iti packaging tape ken maysa a naluktan a transparent a plastik, nasamsam pay dagiti autoridad ti buy-bust money, identification card, ken maysa a Honda a motorsiklo. (Chito Chavez/Manila Bulletin//Lito Hilidon/Bannawag)
