Rinaut dagiti autoridad ti maysa a cold storage iti Meycauayan, Bulacan a nakasamsamanda iti naperdin a frozen meat nga agbalor iti ₱600 a milion idi Marso 12.
Naammuan dagiti autoridad a dagiti frozen meat, a nag-expire pay la idi 2020 ken 2021, ket maiproproseso manen, maikkan iti baro a label ken ma-repack, sa mailako kadagiti groseria.
Natakuatan pay dagiti kameng ti National Bureau of Investigation (NBI) Central Luzon Regional Office ti maysa a bodega a yan dagiti kinahon a naperdin ken agbubuoten nga imported a karne. Ig-iggesen payen ti dadduma a karne. Segun iti report, magiling ken maiproseso manen dagitoy a karne tapno maaramid a kas siomai ken hotdog.
Natiliwan dagiti autoridad dagiti agtrabtrabaho iti bodega nga ik-ikkaten dagitoy dagiti expiration date sticker dagiti produkto sa ikkanda ti baro a label.
Nora Aunor, 71, pimmusay
Kinuna ni Jun Carpeso, regional director ti NBI Central Luzon, a napeggad dagitoy a karne ta saanen a mabalin a kanen ti tao dagitoy.
Kinuna ti abogado ti kompania nga akinkukua kadagiti storage ken bodega a kasaritana ti klientena ket sungbatanda dagiti autoridad iti umno a lugar.
Imbilin met ni director ti NBI Jaime Santiago ti pannakaikkat dagiti nasamsam a produkto a karne iti bodega. (Freddie Velez/Manila Bulletin//Lito Hilidon/Bannawag)
