Iti umuna a gundaway, sumango ni dati a presidente Rodrigo Duterte iti saklang ti International Criminal Court (ICC) ita a rabii ti Biernes, Marso 14 (oras iti Filipinas).
Maibatay iti dokumento a naipaskil iti website ti ICC, maibrodkas ti public hearing nupay mabuya laeng daytoy kalpasan ti 30 a minuto tapno masalakniban dagiti sensitibo nga impormasion.
Dinutokan ni Duterte ni dati nga executive secretary Salvador Medialdea a maysa kadagiti abogadona iti panangbista ti ICC, a mangkadua kenkuana iti panagparangna iti ICC, malaksid pay iti Office of Public Counsel.
Buklen ti Pre-Trial Chamber dagiti tallo nga ukom a da Iulia Antoanella Motoc (presiding judge), Reine Adélaïde Sophie Alapini-Gansou, ken María del Socorro Flores Liera.
Pannakaimprenta dagiti balota, manamnama a malpas itoy a lawas
Iti umuna nga appearance hearing, beripikaren dagiti ukom ti kinasiasino ti suspek ken no maawatanna ti lengguahe nga usarenda iti pannakabista, sa maipakaammo kenkuana dagiti kaso a maibusor kenkuana, kasta met dagiti kalinteganna iti babaen ti ICC Rome Statute.
Naidarum ni Duterte kadagiti kaso a panagpapatay (murder) a maibilang a crime against humanity, a mapapati a naaramid manipud Nob. 1, 2011, idi nagpaay a kas mayor ti Davao City, ken agingga idi Marso 16, 2019, bayat ti panagakemna a kas presidente.
Kinemmeg dagiti autoridad ti Filipinas ni Duterte babaen ti tulong ti Interpol idi Marso 11 kalpasan a naipaulog ti warrant of arrest ti ICC, sakbay a naipaima iti kustodia ti ICC idi Marso 12. (Argyll Cyrus Geducos/Manila Bulletin//Lito Hilidon/Bannawag)
