Imbilin ti Korte Suprema (SC) iti gobierno, nga ibagian ni Executive Secretary Lucas P. Bersamin, nga ilawlawagda iti las-ud ti 24 nga oras no apay a saan koma a maipaulog ti writ of habeas corpus iti kaso ti pannakarestar, pannakaibalud, ken pannakaipaima ni dati a presidente Rodrigo R. Duterte iti International Criminal Court (ICC) iti The Hague, Netherlands.
Inruar ti SC daytoy a pammilin idi 6:30 iti rabii ti Huebes, Marso 13, kalpasan ti napaut a virtual session dagiti ukom nga indauluan ni Chief Justice Alexander G. Gesmundo.
Segun iti pannakangiwat ti SC, nagkaykaysa dagiti ukom a nangresolbar a pagtitiponenda ti petision nga impila da Diputado Paolo Z. Duterte ken ti petition for habeas corpus nga impila da Sebastian Z. Duterte ken Veronica A. Duterte; ket binilinda dagiti respondent (gobierno) nga agpalawag.
Kidkiddawen dagiti tallo a petision nga ideklarar koma ti SC nga illegal ti pannakaarestar, pannakaibalud, ken pannakaipaima ti dati a presidente iti ICC.
Pannakaimprenta dagiti balota, manamnama a malpas itoy a lawas
Ti writ of habeas corpus ti legal a pamuspusan ti umili kontra iti illegal a pannakaarestar ken pannakaibalud, a no mapatgan, mabalin nga ibilin ti korte ti pisikal a pannakaiparang ti tao a naarestar ken naibalud iti korte para iti judicial inquiry.
Itay Marso 11, naiserbi iti dati a presidente ti arrest warrant ti ICC babaen ti tulong ti International Criminal Police Organization (Interpol) apaman a simmangpet daytoy manipud iti Hong Kong, sa naibiahe iti The Hague iti isu met la nga aldaw.
Kamalman ti isu met la nga aldaw, nangidatag da Duterte ken Senador Ronald Dela Rosa, babaen kadagiti abogadoda, iti petision iti SC a nagkiddaw iti pannakaipaulog ti temporary restraining order (TRO).
Itay Marso 12, inwaragawag ti SC a mangipaulog iti TRO, ta saanda a nakaestablisar dagiti nagpetision iti nalawag ken di mapagduaduaan a kalintegan para iti madagdagus a pannakaipaulog ti TRO.
Nupay kasta, imbilin ti SC kadagiti respondent nga agkomentoda iti petision nga impila da Duterte ken De la Rosa iti las-ud ti sangapulo nga aldaw. (Rey G. Panaligan/Manila Bulletin//Lito Hilidon/Bannawag)
