Simmango ni dati a presidente Rodrigo Duterte iti appearance hearing ti International Criminal Court (ICC) iti kasona babaen ti video link idi Biernes Marso 14 (oras iti Filipinas).
Pinalubosan ti presiding judge ti ICC Pre-trial Chamber I a ni Iulia Antoanella Motoc a makipaset ni Duterte babaen ti video link ta nakaseknanda ti napaut a panagbiahe ni Duterte ken ti panagduma ti oras iti Netherlands ken Filipinas.
Nagusar ni Duterte iti headphones tapno mangngegna ti agipatpatarus, ken nagusar iti Ingles tapno kompirmarenna ti naganna, ti petsa ti pannakayanakna, ken ti lugar a nakayanakanna.
Immantendar iti hearing ti dati nga executive secretary-na a ni Salvador Medialdea, a nagpaay a kas abogadona.
Sara Duterte, nangdutok iti agpaay nga abogado ti amana iti ICC
Kalpasan a naibasa dagiti kaso ni Duterte, pinalubosan ni Motoc ni Medialdea nga agsao. Binabalaw a dagus ni Medialdea ti pannakayallatiw ni Duterte iti The Hague. Inawaganna daytoy a kas panagabuso iti proseso.
Kinuna ni Medialdea nga adda parikut iti salun-at ni Duterte, kas iti nakusnaw a panagkita ken saan unay a pannakangngeg. Ngem insungbat ni Motoc a siaammoda a nasalun-at ni Duterte, kas pinasingkedan dagiti doktor ti ICC a nang-check up iti akusado.
Kinuna ni Motoc a segun iti Registry report, pagaammo ni Duterte dagiti kalinteganna, dagiti kaso a nakaidarumanna, ken ti warrant of arrest, iti lengguahe nga Ingles.
Iti sabali a bangir, saan a pinatgan ti ICC Judge ti kiddaw ti kampo ni Duterte a maitantan koma ti appearance hearing, ta saanda a kasapulan ti adu a panagsagana ta nairanta ti umuna a bista para iti pannakayam-ammo kadagiti agsinnumbangir a partido, pannakaipakaammo kadagiti kaso, ken pannakaikeddeng ti petsa ti confirmation of charges hearing.
Innayon ni Motoc nga addanto maaramid a bista a mangitunda iti confirmation of charges nga umisu a pangidatagan kadagiti bambanag a dinakamat ni Medialdea.
Inlawlawag ni Motoc a ti umuna nga appearance hearing ket saan pay a panangrugi ti pannakabista isu a saanda pay a tamingen dagiti ebidensia ken ti saludsod no nagbasol wenno inosente ni Duterte.
Naikeddeng ti pre-trial hearing inton Septiembre 23 tapno kitaenda no umdas dagiti ebidensia ti prosecution ken no maituloy met laeng ti pannakabista ti kaso. (Joyce Ann L. Rocamora/PNA//Lito Hilidon/Bannawag)
