Dinutokan ni Bise Presidente Sara Duterte ni Nicholas Kaufman a kas abogado ti amana a ni dati a presidente Rodrigo Duterte a naidarum iti kaso a crime against humanity iti International Criminal Court (ICC).
Ni Kaufman, maysa nga abogado a Briton ken nairaman iti listaan ti public list of counsel ti ICC, ti agpaay a lead counsel ni Duterte.
Segun ken ni BP Duterte, nakasaritanan ni Kaufman, ket agsaritadanto iti personal apaman a makasangpet iti The Hague ni Kaufman.
Malaksid ken ni Kaufman, mairaman iti legal team ni Duterte dagiti dati a nagpaay kenkuana iti Malakanyang a da Harry Roque ken Salvador Medialdea.
Dati a presidente Duterte, simmango iti damo a hearing iti ICC
Segun iti waragawag ti Pre-trial Chamber I ti ICC, naidarum ni Duterte a kas indirect co-perpetrator iti pannakapapatay ti di nababbaba ngem 19 a tattao a mapapati a drug pusher, wenno mannanakaw, a pinapatay dagiti kameng ti Davao Death Squad kadagiti nadumaduma a lugar iti Siudad ti Davao iti nagbaetan ti 2011 ken 2016.
Adda pay kaso ni Duterte a panangpapatay iti di nababbaba ngem 24 a mapapati a drug pusher, mannanakaw, drug user a pinapapatay dagiti polis wenno babaen ti panangimaton dagiti polis ken no dadduma babaen ti tulong dagiti tattao a saan a kameng ti pannakabagi ti linteg kadagiti nadumaduma a lugar ti Filipinas iti nagbaetan ti 2016 ken 2019.
Inkeddeng ti Pre-Trial Chamber 1 a maangay ti confirmation of charges inton Septiembre 23. (Raymund Antonio/Manila Bulletin//Lito Hilidon/Bannawag)
