Agawaten ti GUMIL Filipinas iti aplikasion para iti fellowship iti Pasnaan 14, ti maika-14 a bansada ti workshop iti panagsurat a para kadagiti mannurat iti Ilokano. Iwayat ken sangailien daytoy ti Bangui National High School iti San Lorenzo, Bangui, Ilocos Norte inton Mayo 16-18, 2025 babaen ti panangiwardas ti GUMIL Filipinas, ken tulong ti National Commission for Culture and the Arts, ken Bannawag Magazine.
Tapno maikonsiderar a maawat a kas fellow, mangidatag ti aplikante iti grupo dagiti sinurat (portfolio), ania man kadagiti sumaganad:
* Uppat nga Ababa a Sarita (dua kadagitoy ti ma-workshop)
* Dua a Sarita (maysa kadagitoy ti ma-workshop)
16 nga OFW a nagrali iti Qatar, mabalin a maibalud iti 3 a tawen
* Uppat a Daniw (dua kadagitoy ti ma-workshop)
* Dua a Sarita a Para Ubbing (maysa kadagitoy ti ma-workshop)
* Uppat a Daniw a Para Ubbing (dua kadagitoy ti ma-workshop)
Masapul a naisurat iti Ilokano dagiti nadakamat a sinurat ken addaan iti title page a nakailanadan ti nagan iti pluma (pen name) ken linaonna (table of contents). Masapul a naka-MS Word document file format (.doc wenno .docx) ti portfolio, nga agusar iti Times New Roman a font, 12 a font size, page size nga 8 1/2" x 11" (letter), ken 1 inch a margin (normal) iti amin nga igid ti page.
Para iti Ababa a Sarita, saan a lumbes iti 500 a balikas ti kada ababa a sarita.
Para iti Sarita, agatiddog iti 10 agingga iti 12 a panid, doble espasio.
Para iti Daniw, saan a makedngan ti tema ken kaatiddog, single spaced.
Para iti Sarita a Para Ubbing, puntiriaen a reader dagiti adda iti Grado 1-3, ken saan a lumbes iti 700 a balikas, doble espasio.
Para iti Daniw a Para Ubbing, puntiriaen a reader dagiti adda iti Grado 1-3, ken agatiddog iti 4 a kelleng (estansa), single spaced.
Pakuyogan dagiti manuskrito (soft copy) iti sabali nga MS Word document file a nakailanadan ti pudno a nagan ti autor, adres, pakakontakan a numero, email address, ababa a pakasaritaan ti biag (bionote) ken kabaruan nga ID photo. Y-email iti [email protected] ken i-cc ti [email protected] ken usaren ti paulo (email subject) a “Pasnaan 14.”
Agdalan dagiti sinurat iti panagarisit ti Pasnaan 14 Screening Committee para iti pannakapili dagiti agbalin a fellow. Mapakaammuanto dagiti autor dagiti mapili a gapuanan babaen ti email ken/wenno awag iti selpon.
Walo ti mapili a fellow. Maipaayanda iti sangkabassit nga honorarium.
Aggibus ti panagidatag iti aplikasion iti alas 11:59 ti rabii iti Abril 13, 2025 (saan nga Enero 31, 2025 kas immuna a naiwaragawag). Maipakaammo met ti nagan dagiti fellow inton Abril 27, 2025.
Para iti ad-adu pay nga impormasion, umawag wenno ag-text iti 0955 728 0505 (Freddie Masuli) wenno ag-email iti [email protected]. (Pasnaan 14 Secretariat)
