Sinupiat ti Moro Islamic Liberation Front (MILF) ti nabiit pay a pannakabalbaliw ti liderato iti Bangsamoro Autonomous Region in Muslim Mindanao (BARMM), nangruna iti panangdutok ni Presidente Ferdinand R. Marcos Jr. ken ni Abdulraof Macacua a kas baro nga interim chief minister (ICM) agraman dagiti dadduma pay a baro a kameng ti Bangsamoro Transition Authority (BTA).
Iti naangay a consultative assembly ti MILF, kinunada a saan a mayannurot iti rekomendasionda ti pannakadutok ni Macacua ken dagiti baro a kaneg ti BTA, ta 35 laeng kadagiti 41 nga inrekomendarda ti dinutokan ni Marcos.
Impaganetget ti grupo a maysa a pannakibiang daytoy iti internal affairs ti MILF ken pananglabsing iti prinsipio ti autonomia a sagudayen ti Bangsamoro Organic Law (BOL).
Innayon ti MILF a malabsing pay ti Comprehensive Agreement on Bangsamoro nga agkunkuna a ti MILF ti mangimaton iti BTA.
16 nga OFW a nagrali iti Qatar, mabalin a maibalud iti 3 a tawen
Kinuna ti MILF a saan nga impangag ti gobierno ti impaganetget ti MILF a panagtalinaed ti ICM ta binukbukodan ti gobierno ti mangdutok ken ni Macacua.
Nupay bigbigen ti MILF ti karbengan ti presidente iti panangdutok iti ICM, kinunada a masapul a nayuman pay kadakuada daytoy a pangngeddeng.
Ni Ebrahim, a nalatak iti nagan nga Al Haj Murad, ti agdama a daulo ti MILF, idinto a ni Macacua ti chief of staff ti armado a grupo a Bangsamoro Islamic Armed Forces (BIAF).
Innem a BIAF front commander ken 33 a base commander ti nangyebkas iti panangsuportar ken panagtalekda iti liderato ni Ebrahim. (Keith Bacongco/Manila Bulletin//Lito Hilidon/Bannawag)
