Insayangkat dagiti pasurot ni dati a presidente Rodrigo R. Duterte dagiti rali iti nadumaduma a paset ti Filipinas ken iti ballasiw-taaw, nga agkidkiddaw iti pannakairuar ni Duterte iti pagbaludan ken ti pannakaisubli daytoy iti Filipinas.
Iti Siudad ti Manila, nagtitipon dagiti rinibu a pasurot ni Duterte iti prayer rally nga insayangkat ti Kingdom of Jesus Christ (KOJC) iti Liwasang Bonifacio, iti sango ti Manila Central Post Office idi Sabado, Marso 15.
Nagbalin met a sentro dagiti protesta ti Siudad ti Davao a baluarte ni Duterte. Nagtitipon dagiti tattao iti agsasaruno a lima nga aldaw manipud idi naipan ni Duterte iti International Criminal Court (ICC) iti The Hague, Netherlands idi Marso 11.
Idi Marso 16, agarup 30,000 a pasurot ni Duterte ti nakipartisipar iti solidarity walk a naangay iti Davao City. Impukpukkawda ti pannakawayawaya ti dati a presidente.
16 nga OFW a nagrali iti Qatar, mabalin a maibalud iti 3 a tawen
Manipud idi Marso 11, rinabii ti panag-motorcade, noise barrage, ken prayer rally iti 182 a barangay iti Davao City.
Adda met naangay a rali iti Koronadal City, Basilan, Davao de Oro, ken General Santos City.
Nangangay met iti rali dagiti pasurot ni Duterte iti nadumaduma a siudad iti ganggannaet, a pakairamanan ti Madrid, Spain; Tokyo ken Osaka iti Japan; Helsinki, Finland; Berlin, Germany; Toronto, Canada; Prague, Czech Republic; Seoul, South Korea; ken Auckland, New Zealand.
Kinuna dagiti nangorganisar iti rali a saanda a sumardeng agingga a saan a maisubli iti Filipinas ni Duterte. (Diann Ivy C. Calucin, Ivy Tejano & Keith Bacongco/Manila Bulletin//Lito Hilidon/Bannawag)
