Kayat ni Senadora Imee Marcos, daulo ti Committee on Foreign Relations, a paimbestigaran ti pannakaarestar ni dati a presidente Rodrigo Duterte, a para kenkuana, ket maysa a parikut a namagsisina iti pagilian.
Kinuna ni Marcos ita nga aldaw, Marso 17, a masapul a kitaenda no pudno a nasurot ti due process ken no nasalakniban met laeng dagiti karbangan ni Duterte, gapu ta nairaman ditoy ti International Criminal Police Organization (Interpol) ken ti International Criminal Court (ICC).
Inawis ni Marcos dagiti opisial dagiti maseknan nga ahensia kas iti Philippine National Police (PNP), Office of Transportation Security-Department of Transportation (OTS-DOTr), Department of Justice (DOJ), Department of Foreign Affairs (DFA), National Security Council (NSC), and the Civil Aviation Authority of the Philippines (CAAP), ken dadduma pay, nga agpaay a kas resource persons.
Kinuna ni Marcos a masapul a tamingen ti Senado daytoy a parikut tapno malawlawagan dagiti paglintegan mainaig kadagiti law enforcement agency ti pagilian ken ti pannakitinulongda iti internasional a pangukoman. (Dhel Nazario/Manila Bulletin//Lito Hilidon/Bannawag)
