Pinakdaaran ti Presidential Communications Office (PCO) ti publiko nga agridamda gapu iti yaadu ti agwaras a palso a damag (fake news) iti internet iti napalabas a lawas.
Kinuna ni Undersecretary ti PCO Claire Castro ita nga aldaw, Marso 17, a nakaro ti panagraira dagiti palso a padamag kalpasan ti pannakaarestar ni dati a presidente Rodrigo Duterte iti International Criminal Court (ICC) idi Marso 11.
Segun ken ni Castro, ad-adalen ti PCO no ania ti mabalinda nga aramiden a maibusor kadagiti agiwarwaras iti fake news.
Makium-uman ti PCO iti National Bureau of Investigation (NBI) ken Philippine National Police (PNP) kalpasan ti pakaammo nga adda gandatda a mangtiliw kadagiti tao nga agiwarwaras iti fake news.
16 nga OFW a nagrali iti Qatar, mabalin a maibalud iti 3 a tawen
Dinakamat ni Castro ti maysa nga insidente maipapan iti imbaga ni dati nga executive secretary Salvador Medialdea, a mapukpukaw ni Duterte, ngem kinuna ti ICC a saan a pudno daytoy.
Nadakamat met ti maysa nga insidente nga imbaga ni mayor ti Davao City Sebastian Duterte a nakaawat iti report a rauten dagiti polis ti balayda, ngem kinuna ti PNP a saan a pudno daytoy.
Kinuna ni Castro a rumbeng a paliiwen, amirisen, ken adalen ti publiko dagiti saan a responsable a warwaragawag tapno saan a maallilaw ti panunot ken riknada. (Argyll Cyrus Geducos/Manila Bulletin//Lito Hilidon/Bannawag)
