Impakaammo ti National Tobacco Administration (NTA) ti panangrugi dagiti operasion ti panaglako ti tabako a birhinia para iti cropping season ti 2024–2025 kalpasan ti pannakalukat dagiti buying station iti Rehion 1 ken iti Abra.
Kinuna ni Administrator ken CEO ti NTA Belinda S. Sanchez a nasukimaten dagiti extension worker ti NTA dagiti trading equipment ken pasilidad dagiti dua a kadadakkelan a paglakuan iti tabako iti rehion ti Ilokos sakbay ti panaggibus ti Pebrero.
Naselioanen dagiti naituding a field worker ti NTA ti amin a timbangan dagiti buying station kalpasan ti calibration dagitoy babaen ti panangusar iti weighing test a sertipikado ti Department of Science and Technology (DOST). Na-calibrate pay dagiti timbangan dagiti akreditado a field canvasser. Naisayangkat dagitoy tapno masigurado ti kinaumisu ti pannakatimbang ti amin a bulong ti tabako a yeg dagiti mannalon kadagiti trading center.
Rinugianen dagiti mannalon ti tabako, a nagmula idi pay maudi a lawas ti Nobiembre 2024, ti nangitulod iti apitda a naluton (naipugonen) a birhinia kadagiti trading center ta abotenna ti 60 nga aldaw kalpasan ti panagmula sakbay ti umuna nga apit dagiti nataenganen a bulong ti tabako.
Mabalin a matulongan nga agawid dagiti Filipino a naawanan iti trabaho gapu iti ginggined iti Myanmar -- DFA
Silulukaten dagiti trading warehouse ti Universal Leaf Philippines, Inc. (ULPI) iti Agoo, La Union ken Siudad ti Candon ken Cabugao iti Ilocos Sur; Currimao, Ilocos Norte; ken Bangued, Abra; ken ti bodega ti Trans Manila Incorporated (TMI) iti San Juan, Ilocos Sur tapno adda pagipanan dagiti mannalon kadagiti apitda.
Iti panangrugi ti tobacco trading operations iti 2025, ₱107 ti paggatang dagiti trading center iti kada kilo ti prime class a naluton a tabako, idinto a dagiti field canvasser iti umuna a distrito ti Ilocos Sur, gatangen ti isu met la a klase ti tabako iti umabot iti ₱125 kada kilo.
Dagiti sumaganad dagiti naaprobaran a tobacco floor price dagiti klase ti amin a kita ti tabako para iti daytoy a season:
Para iti a tabako a birhinia: Class AA – ₱97; A – ₱96; B – ₱95; C – ₱93; D – ₱85; E – ₱84; F1 – ₱75; F2 – ₱72 ken R – ₱61.
Para iti tabako a burley: Class A – ₱81; B – ₱78; C – ₱69; D – ₱58; E – ₱57; F – ₱49; ken R – ₱39.
Para iti native a tabako: High Grade – ₱81; Medium 1 – ₱70; Medium 2 – ₱60; Low 1 –₱50; ken Low 2 – ₱38.
Iti aktual a panaggatang, kadawyan a gatangen dagiti negosiante ken dagiti field canvasser dagiti bulong ti tabako nga apit dagiti mannalon iti presio a nangatngato ngem dagiti naaprobaran a floor price. (Freddie G. Lazaro/DA-NTA)
