Inkeddeng ti Korte Suprema (SC) nga imbestigarenda ti naipaskil iti social media nga agkunkuna nga adda naawat ti SC a “Petition on 16 Million Signatures Calling for President Marcos’ Resignation.”
Iti naipaskil iti Facebook Page a “Choose Libungan” ken account iti Facebook a “Bernard Flores Maicon," inwaragawagda pay a maangay ti full court session ti SC iti Marso 17 tapno pagsasaritaanda ti nasao a petision. Nairaman iti paskil ti pannakangiwat ti SC a ni Camille Sue Mae L. Ting.
Iti maysa nga statement, kinuna ni Ting a saan a pudno ti naipaskil a dokumento ken awan ti naawatda a petision mainaig iti panaglusulos ni Presidente Marcos ken awan ti maangay nga en banc session iti Marso 17.
Segun ken ni Ting, imbestigaren ti SC dagiti palso a damag, agraman ti maysa pay a palso a damag nga adda inruar ti SC a temporary restraining order (TRO) idi Marso 11. Maipaayan iti umisu a dusa kadagiti akin-aramid kadagitoy, innayon ni Ting.
Grupo dagiti mannursuro, nagkiddaw iti pannakaipatungpal ti 'teacher-friendly' nga iskediul iti SY 2025-2026
Pinakdaaran ni Ting ti publiko nga agpannurayda laeng kadagiti opisial a pakaammo ti SC a maipaskil iti official website-da ken kadagiti verified social media account ti SC.
Innayon ni Ting nga agannad koma ti publiko iti panangi-share-da kadagiti saan a napatalgedan nga impormasion iti Facebook, nga agkunkuna a naggapu iti Korte Suprema. (Rey G. Panaligan/Manila Bulletin//Lito Hilidon/Bannawag)
