Imbilin ni Commissioner ti National Police Commission (NAPOLCOM) Rafael Vicente Calinisan iti Inspection, Monitoring and Investigation Service (IMIS) ti madagdagus a pannakaimbestigar ken mapilaan iti kaso nga administratibo ti polis ti Quezon City Police Depertment (QCPD) a ni Patrolman Francis Steve Tallion Fontillas gapu iti mapapati a "panagpolpolitika" daytoy iti social media.
Segun ken ni Calinisan, nalawag nga inusar ni Fontillas ti social media account-na para iti partisan politics, a maikontra iti Primer on Personnel Decorum ken Code of Ethics ti Philippine National Police (PNP).
Kinuna pay ni Calinisan a dagiti paskil ni Fontillas, agdadata a panangpadakes ken malisioso ket mabalin a maibilang nga "inciting to sedition" wenno panangsugsog iti panangtippuog iti gobierno.
Impaganetget met ni Calilnisan a nupay adda karbengan dagiti kameng ti PNP a siwayawaya a mangyebkas iti bukodda a kapanunotan, limitado daytoy gapu iti pagrebbenganda nga agtalinaed a neutral ken liklikan ti ania man nga aramid a mabalin a makadadael iti panagtalek ti publiko.
Grupo dagiti mannursuro, nagkiddaw iti pannakaipatungpal ti 'teacher-friendly' nga iskediul iti SY 2025-2026
“Ulitek, ti unipormado a serbisio ket masapul a patinayon nga apolitikal. Ti kangrunaan a panggep ti PNP ket ti panangsigurado iti kinatalged ti publiko, panangipatungpal iti linteg, ken panagserbi ken panangsalaknib kadagiti umili Saan a nairanta a kumanunong iti political sides. Nadagsen a pannusa ti agur-uray kadagiti aglabsing kadagiti linteg ti eleksion, paglintegan ti serbisio sibil, pagalagadan ti NAPOLCOM ken PNP, ken dadduma pay nga administratibo a pagannurotan,” kinuna ni Calinisan. (Merry Ann Bastasa/Radyo Pilipinas)
