Masapul a sukimaten ni Solicitor General Menardo Guevarra iti bagina no rumbeng nga agtalinaed a kas kangrunaan nga abogado ti gobierno.
Daytoy ti kinuna ni Undersecretary ti Presidential Communications Office (PCO) Claire Castro kalpasan ti panagkitakit ni Guevarra a mangidepender iti posision ti gobierno iti pannakaarestar ni dati a presidente Rodrigo Duterte.
Nupay awan pay ti official statement manipud iti Malakanyang maipapan iti sumaruno nga aramidenda kalpasan ti panagkedked ni Guevarra, kinuna ni Castro a napateg unay ti maaddaan iti abogado nga epektibo a mangidepensa iti gobierno kadagiti kaso.
Segun ken ni Castro, daytoy a panagkedked ni Guevarra ti mabalin nga usaren ti bangir a partido a mangpatibker iti pammatida a saan a nainkalintegan ti pannakaarestar ni Duterte.
Ngem inlawlawag ni Castro a saan nga imbaga ni Guevarra a biddut ti pannakitinnulong ti gobierno iti Interpol, malaksid iti panangdakamatna nga awan ti hurisdiksion ti ICC iti Filipinas.
Articles of Impeachment kontra ken ni VP Duterte, dimmanonen iti plenario ti Kamara
Kinuna ni Castro a maitunos ti impalnaad ni Guevarra iti pagtaktakderan ti Presidente nga awan ti hurisdiksion ti ICC iti Filipinas. Ngem saan a dinakamat ni Guevarra ti pannakitinnulong ti gobierno iti Interpol.
Iti pannakaisursurat daytoy a damag, saan pay a napagsasaritaan no asino ti mangibagi iti gobierno iti kaso mainaig iti pannakaarestar ni Duterte. (Betheena Unite/Manila Bulletin//Lito Hilidon/Bannawag)
