Indarum ti Quezon City Police District (QCPD) idi Marso 17 ti maysa a polis gapu iti panagipaspaskilna iti Facebook kadagiti video a maibusor iti administrasion ni Presidente Ferdinand Marcos Jr. ken kadagiti autoridad ti Philippine National Police (PNP).
Segun iti QCPD, kaso a panaglabsing iti Article 142 (Inciting to Sedition) ti Revised Penal Code, a mainaig iti Republic Act No. 10175 (Cybercrime Prevention Act of 2012) dagiti indatagda iti Quezon City Prosecutor’s Office, a maibusor ken ni Patrolman Francis Steve Tallion Fontillas.
Nagipaskil ni Fontillas, babaen ti Facebook page-na a "Fonts Stv Vlogs" iti adu a video ken teksto a mangipangpangta iti gubat iti International Criminal Court (ICC) ken Interpol, ken mangbabbabalaw iti agdama nga administrasion, iti pannakaarestar ni dati a presidente Duterte, ken kadagiti opisial ti PNP.
Segun iti rekord ti District Personnel Records and Management Division (DPRMD), naisaad ni Fontillas iti District Personnel and Holding Admin Section (DPHAS) idi Pebrero 20, 2025, ngem nag-AWOL (absent without official leave) daytoy sipud idi Marso 6, 2025.
3 tao iti Antipolo, nadangran gapu iti riribuk iti kalsada
Pinalagipan ti QCPD dagiti kamengda nga umannurot iti kangatuan a tukad ti kinapropesional ken disiplina, ken agtalinaedda nga apolitical ken non-partisan iti amin nga oras, ken liklikanda ti agipaskil iti di autorisado a banag iti social media ken dadduma pay a platform. (Allysa Nievera/Manila Bulletin//Lito Hilidon/Bannawag)
