Inkari ni dati a presidential spokesperson Harry Roque nga ar-aramiden dagiti abogado ti depensa ti amin a pamuspusan tapno makaawid ni dati a presidente Rodrigo Duterte nga agdama a nakabalud iti International Criminal Court (ICC) Facility iti The Hague gapu iti kasona a crimes against humanity (murder).
Iti maysa a virtual press conference idi Marso 17, kinuna ni Roque a saanda nga agawid a dida kadua ni Duterte.
Maysa a dati nga abogado ti human rights ken eksperto iti international law ni Roque, ngem pimmanaw iti Filipinas idi 2024 gapu iti mapapati a pannakairamanna iti operation ti POGO, agingga a nasaripatpatan ti kaaddana iti The Hague, Netherlands kalpasan ti pannakaarestar ni Duterte.
Kinuestionar ni Roque ti pannakaarestar ni Duterte ket segun kenkuana, saan a nasurot ti umno a proseso kas maibatay iti Article 59 ti Rome Statute, gapu ta saan a naidatag ni Duterte iti lokal a korte.
3 tao iti Antipolo, nadangran gapu iti riribuk iti kalsada
Ngem kinuna ti dadduma nga eksperto iti linteg, saanen a sakup ti Filipinas iti Article 59 ta saanen a kameng ti ICC sipud idi 2019.
Segun iti abogado ni Duterte, adda gandatda nga panang-motion iti pannakawaswas ti kaso a crimes against humanity sakbay ti naikeddeng a hearing inton Septiembre 23.
Innayon ti abogado nga agkiddawda iti interim release ti dati a presidente idinto nga innem pay a bulan ti palabsen sakbay ti sumaruno a hearing.
Ngem segun kadagiti report, saan a mangmangted iti interim release ti ICC kadagiti naidarum iti crimes against humanity. (Raymund Antonio/Manila Bulletin//Lito Hilidon/Bannawag)
