Binilin ti Korte Suprema ita nga aldaw, Marso 18, dagiti tallo nga anak ni dati a presidente Rodrigo R. Duterte a mangidatagda iti sungbat iti kiddaw ti Department of Justice (DOJ) a pannakawaswas ti petition for habeas corpus gapu ta moot and academic ken awan merito daytoy.
Idi Marso 12, impila da Mayor ti Siudad ti Davao Sebastian Z. Duterte, Veronica A. Duterte, ken Diputado Paolo Z. Duterte ti petition for writ of habeas corpus kalpasan a maarestar ti amada.
Ni Undersecretary Officer-in-Charge ti DOJ Nicholas Felix L. Ty ti nangibagi ken nangipila iti consolidated compliance iti biang dagiti respondent.
Segun iti DOJ, awanen mamaay ti writ of habeas corpus ta saanen nga iggem ti gobierno ti dati a presidente, ket dinakamatda ti Section 2, Rule 102 ti Rules of Court nga agkunkuna a maipakat laeng ti writ of habeas corpus iti Filipinas.
3 tao iti Antipolo, nadangran gapu iti riribuk iti kalsada
Inlawlawag ti DOJ a ti panggep ti habeas corpus ket ti pannakawayawaya ti maysa a tao a di nainkalintegan ti pannakaibaludna, ngem saan a maipakat ti habeas corpus ta adda naipaulog a warrant of arrest a maibusor iti dati a presidente, ket naipatungpal daytoy kas mayanatup iti Republic Act (R.A.) No. 9851.
Impaganetget ti DOJ a tinungpal laeng ti gobierno ti Filipinas ti internasional a kooperasionna iti Interpol.
Kalpasan ti full court session ti SC ita a Marso 18, inikkan ti SC iti lima nga aldaw dagiti annak ni Duterte a personal a mangipila iti sungbatda iti consolidated compliance ti DOJ.
Kalpasanna, mangangay manen ti SC iti special session tapno pagsasaritaanda ti nasao a petision. (Rey G. Panaligan/Manila Bulletin//Lito Hilidon/Bannawag)
