Isagsaganan ti Philippine National Police (PNP) ti ad-adu pay a kriminal ken administratibo a kaso kontra iti maysa a kameng ti Quezon City Police District (QCPD) a mapapati a mangat-atakar ken ni Presidente Ferdinand Marcos Jr. ken kadagiti nangangato nga opisial ti PNP kadagiti vlog-na mainaig iti pannakaarestar ni dati a presidente Rodrigo Duterte.
Kinuna ti spokesperson ti PNP a ni Brig. Gen. Jean Fajardo a mainayon dagti kaso iti kaso a kriminal nga inciting to sedition nga impila ti Quezon City Police District kontra ken ni Patrolman Francis Steve T. Fontillas idi Lunes, Marso 17, gapu iti agsasaruno a paskil daytoy a mangbabbabalaw ken mangkarkarit iti gobierno ken iti PNP sipud pannakaarestar ni Duterte idi Marso 11.
Segun ken ni Fajardo, dokdokumentaranen ti Anti-Cybercrime Group (ACG) dagiti inwarwaragawag ni Fontillas para iti pannakaisagana ti dadduma pay a kriminal ken administratibo a darum a maipila kontra iti polis.
Isagsagana metten ti QCPD ken ti National Police Commission (NAPOLCOM) dagiti kaso nga administratibo. Kasuan ti QCPD ni Fontillas gapu iti maulit-ulit a dina panangikankano iti pammilin kenkuana nga ag-report iti Camp Karingal. Kasuan met ti NAPOLCOM ni Fontillas gapu iti panaglabsingna kadagiti pagalagadan ken pagannurotan iti panagusar iti social media dagiti adda iti police service.
Grupo dagiti mannursuro, nagkiddaw iti pannakaipatungpal ti 'teacher-friendly' nga iskediul iti SY 2025-2026
Kinuna ni Fajardo a dagiti maisagsagana a mainayon nga administratibo a kaso ket pakairamanan ti panangat-atakar ni Fontillas kontra ken ni PNP Chief Gen. Rommel Francisco Marbil, kasta met ken ni Maj. Gen. Nicolas Torre, ti pangulo ti Criminal Investigation and Detection Group (CIDG) a nangisayangkat iti pannakatiliw ni Duterte.
Ti kangatuan a dusa para kadagiti nadagsen nga administratibo a darum ket pannakaikkat iti police service.
Kinuna pay ni Fajardo a segun iti background check ken ni Fontillas, naammuan a mabalin nga addaan iti "mood swings" wenno panagbaliwbaliw ti gargaraw daytoy.
“Nabagaan idin nga agpaeksamen iti neuro-psychiatric ken saan a daytoy ti umuna a gundaway (a panagkastoyna) ta addan dagiti immun-una a rekord ti panagbaliwbaliw ti gargaraw idi pay 2023,” kinuna ni Fajardo.
Innayonna a nagpaagas idin ni Fontillas tapno mataming ti “mood swings”-na.
Ti agdama a kababalin ni Fontillas iti social media, segun ken ni Fajardo, mabalin nga adda pakainaiganna iti problemana iti “mood swing” a sagsagabaenna.
Kinuna pay ni Fajardo nga ur-urayenda laeng ti pannakaipaulog ti pammilin mainaig iti maulit-ulit a panagkedked ni Fontillas nga ag-report iti duty sakbay a madis-armaran (maipasubli ti armas wenno paltogna).
“Gapu iti saan a gagangay a kababalin ken panagbalbaliw ti gargaraw daytoy a polis, madis-armaran ken mabalin a maipasidong iti restrictive custody,” innayon ni Fajardo.
Kabayatanna, iti maysa nga statement, impalagip manen ni Marbil ti nainget a panangtungpal ti PNP iti neutralidad.
"Maysa nga adigi ti kinalinteg ken kinaurnos ti PNP, saan a plataporma para kadagiti personal wenno politikal a pakaseknan. Agserbi koma daytoy a kas pakdaar—asino man a police officer a mangdadael kadagiti kangrunaan a tagipatgentayo iti integridad, serbisio, ken propesionalismo ket sanguenda ti naan-anay a puersa ti linteg. Ditay' pulos ipalubos ti partisan nga impluensia a mangreggaay iti panagtalek ti publiko iti PNP,” kinuna ni Marbil.
“Ipaganetget ti PNP ti zero tolerance-na iti political bias kadagiti taona. Maipalagip kadagiti amin a personnel nga agtalinaedda nga apolitikal ken itandudoda dagiti kangatuan nga ethical standards, iti man opisial nga annongenda wenno iti personal a panagtigtignayda, a pakairamanan ti kaaddada iti social media,” innayonna. (Aaron Recuenco/MANILA BULLETIN)
