Kinuna ni Senador Ronald "Bato" Dela Rosa ita a Mierkoles, Marso 19, a no maipaulog ti arrest warrant manipud iti International Criminal Court (ICC) kontra kenkuana, pilienna laengen ti aglemmeng.
Maisupadi daytoy iti immun-una a deklarasionna nga isukona ti bagbagina apaman a mairuar ti arrest warrant kontra kenkuana.
"No awan met la ti manamnamatayo a hustisia ditoy pagiliantayo, apay koma a sumukoka, di ngamin? Kitaentayo, no adda uray sangkabassit laeng a namnama a talaga a takderan ti Korte Suprema ti kinaindependientena, ken no aramiden ti Senado ti rebbeng nga aramidenna, kitaekto no kasano, no ania ti situasion," kinuna ni Dela Rosa.
Immunan nga imbaga ni Dela Rosa a nakasagana a mangkadkadua ken ni dati a presidente Rodrigo Duterte iti The Hague.
Filipinas, nangipatulod iti emergency response team iti Myanmar
Naituding a mabista ti pannakakonpirmar kadagiti kaso ni Duterte inton Septiembre 23 wenno kalpasan ti innem pay a bulan.
Kinuna ti dati a hepe ti Philippine National Police (PNP) a mabalinna koma ti aglibas ken aglemmeng no kayatna.
"Nakalawlawa ti Filipinas a paglemmengak. Mabalinko ti aglibas ken mabalinko nga usaren dagiti koneksionko tapno makalemmengak," kinunana iti maysa nga interbiu idi napan a lawas. (Dhel Nazario/MANILA BULLETIN)
