Rebbengna nga umuna a depensaaan ni dati a presidential spokesperson Harry Roque ti bagbagina kadagiti kaso kontra kenkuana iti Filipinas sakbay a depensaanna ti sabsabali, kinuna ni Palace Press Officer ken Communications Undersecretary Claire Castro.
Imbatad daytoy ni Castro kalpasan ti waragawag ni Bise Presidente Sara Duterte a saan a mairaman ni Roque ti defense team ni dati a presidente Rodrigo Duterte kabayatan ti pannakabista daytoy iti International Criminal Court (ICC).
"Mabalin a nadamagyon a saanen a a mairaman ni Atty. Harry Roque a kas parte ti ti legal team ni dati a presidente Duterte," kinuna ni Castro iti maysa a briefing iti Malakanyang ita a Mierkoles, Marso 19. "No kinunana a saanen nga agawid ta isu ti mangibagi iti presidentena, nasaysayaat no isu ti mangibagi nga umuna iti bagbagina sakbay a depensaanna ti sabali."
Kabayatanna, saan a nagkomentar ti Malakanyang no makibiangda iti panagkiddaw ni Roque iti asylum iti Netherlands.
19 a Filipino a nakemmeg iti Qatar, adda pay laeng iti sidong ti polis
Naakita iti publiko ni Roque iti umuna a gundaway, kalpasan ti sumagmamano a bulan a mapapati a panaglemlemmengna, idi agsapa ti Biernes, Marso 14 (oras iti Netherlands) sakbay ti umuna a pannakaiparang ni Duterte iti ICC. Iti dayta nga aldaw, kinuna ni Roque a maysa isuna kadagiti agpaay nga abogado ni Duterte.
Naipan iti immigration lookout ti nagan ni Roque kalpasan a nairaman iti kaso a qualified human trafficking a naipila kontra ken ni Cassandra Li Ong ken dadduma pay a high-profile suspects iti illegal nga aktibidad ti hub ti Philippine Offshore Gaming Operators (POGO) a Lucky South 99 Corp. a rinaut dagiti autoridad. (Betheena Unite/MB)
