Impakaammo ni Bise Presidente Sara Duterte ita nga aldaw, Marso 19, a saanen a mairaman da Salvador Medialdea (dati nga executive secretary) ken Harry Roque (dati a pannakangiwat ti presidente) iti defense team ni dati a presidente Rodrigo Duterte iti kasona iti International Criminal Court (ICC).
Segun ken ni BP Duterte, saanen a mairaman ni Medialdea gapu ta kaykayatda ti abogado nga addaan padas iti ICC.
Nupay rehistrado iti ICC ni Roque, saan a mairaman iti defense team ta masapul nga urnosenna nga umuna ti kiddawna nga asylum iti Netherlands.
Kinuna ni BP Duterte a malaksid ken ni Nicholas Kaufman a tumakder a kas abogado ti dati a presidente, agsapul pay ni BP Duterte iti kakadua ni Kaufman.
Grupo dagiti mannursuro, nagkiddaw iti pannakaipatungpal ti 'teacher-friendly' nga iskediul iti SY 2025-2026
Kinuna ni BP Duterte a buklen ti defense team kadagiti ganggannaet nga abogado, ngem dina ketdi imbaga no nangpili ti amana manipud iti listaan ti abogado ti ICC wenno agbayadda iti bukodda nga abogado.
Innayon ni BP Duterte nga itaklinnan ken ni Kaufman dagiti detalye ti depensada, ken no mano nga abogado ti mangkadua kenkuana. (Raymund Antonio/Manila Bulletin//Lito Hilidon/Bannawag)
