Kayat ti Department of Transportation (DOTr) a kapatang ti transport group a Manibela kalpasan nga impalgakda a mangangay iti tallo nga aldaw a panagwelga mangrugi inton Marso 24.
Kinuna ti DOTr idi Marso 18 a bigbigenda ti kalintegan ti grupo a mangipeksa iti pakaseknanda.
Pinusgan ni Sekretario ti DOTr Vince Dizon ni Assistant Secretary for Road Transport and Non-Infrastructure Dioscoro ‘Jojo’ Reyes a mangangay iti dayalogo kadagiti kameng ti Manibela iti kabiitan a panawen.
Isayangkat ti Manibela ti welga gapu iti maipagarup a di umisu a bilang dagiti nagkonsolidar nga immatonan ti Land Transportation Franchising and Regulatory Board (LTFRB).
Kasano a maipaayantayo iti seguridad ni Dela Rosa no mapukpukaw met, kuna ti Palasio
Segun iti Manibela, saan a pudno ti iwarwaragawag ti LTFRB nga addan 86 a porsiento dagiti operator ken drayber ti public utility vehicle (PUV) ti nagkonsolidar para iti public transport modernization program (PTMP) ti gobierno.
Pinatalgedan daytoy ti kinuna ni Dizon a 43 a porsiento pay laeng ti inaprobaran ti LTFRB.
Sipud pannakaipatungpal ti PTMP idi 2017, adun a grupo ti nangsupiat iti daytoy, gapu ta maapektaran ti pagbiagan dagiti drayber ken operator.
Impaganetget ni Dizon nga agtultuloy a maipatungpal ti PTMP iti babaenna, a di mangdadael iti pagbiagan dagiti agpannuray iti dyip. (Dexter Barro II/Manila Bulletin//Lito Hilidon/Bannawag)
