Mabalin a mangipaulog ti tri-committee (tri-comm) ti Kamara iti contempt ket ibilinda ti pannakaarestar tapno mai-detain ti sumagmamano a social media personalities ken vloggers a pakairamanan ni dati a Secretary ti Presidential Communications Office (PCO) Trixie Cruz-Angeles no dida manen ikankano wenno dida agatendar iti joint panel hearing maipapan iti fake news
Malaksid ken ni Cruz-Angeles, mairaman a posible a ma-cite for contempt da Aeron Peña, Allan Troy “Sass” Rogando Sasot, Elizabeth Joie Cruz, Dr. Ethel Pineda Garcia, Jeffrey Almendras Celiz, Lorraine Marie Tablang Badoy-Partosa, Mark Anthony Lopez, Mary Jean Quiambao Reyes, ken Richard Tesoro Mata.
Babaen ti panangidaulo ti overall chairman a ni Santa Rosa City lone district Rep. Dan Fernandez, angayen ti tri-comm ti sumaruno a hearing-na inton Biernes, Marso 21.
Bayat ti House hearings in aid of legislation, mai-cite for contempt dagiti resource person no saanda a makitinnulong iti panagimbestigar wenno no mapapati nga adda kalkalubanda.
China, inlibakna a nagkiddaw ni Duterte iti asylum
Immunan a nangipaulog ti tri-comm iti show cause orders kadagiti indibidual a nainaig iti panagsaknap ti manangalilaw nga online content, kalpasan a dida timmabuno iti umuna a hearing.
Iti laksid ti nagkaadu a summons, sumagmamano kadagiti naawis a resource person ti saan a nagapelar. Daytoy ti nangtignay iti tri-comm a mangiwayat kadagiti legal nga addang, a pakairamanan ti panangipaulog kadagiti subpoena a maiserbi kontra kadagiti vlogger.
"Maysa nga isyu iti nailian a seguridad ti disinformation. Dadadaelen daytoy ti panagtalek ti publiko, riribukenna dagiti institusion, ken manipularenna ti demokratiko a diskurso. Ditay' mabalin nga ipalubos ti social media nga agbalin a nawaya-para-amin a plataporma para iti panangallilaw ken propaganda," kinuna ni Fernandez.
Kinuna ni Fernandez nga ipatungpal ti komite dagiti contempt citation tapno maitandudo ti integridad dagiti congressional investigation.
“Adda autoridad ti Kongreso a mangayab kadagiti indibidual tapno agtestigo kadagiti banag a pakaseknan ti publiko. Ti di panangidandaneng kadagiti nainlintegan a pammilin ket direkta a panangkarit iti institusiontayo ken dagiti demokratiko a prinsipio a salsalaknibantayo,” inlawlawagna.
Maisayangkat ti hearing iti baet ti imbatad dagiti kongresman a nakarkaro manen a disinformation campaign manipud kadagiti maka-Duterte a content creator, a ginubuay ti panangarestar ken panangikulong ti International Criminal Court (ICC) ken ni dati a presidente Rodrigo Duterte itay nabiit.
Sakbayna, inlawlawag ni Surigao del Norte 2nd district Rep. Robert Ace Barbers a ti iwaywayatda nga imbestikasion iti fake news ket saan a nairanta a manglapped iti wayawaya ti panagipeksa wenno panagsao.
Ti nayiskediul a hearing inton Biernes ket mangitampok pay kadagiti testimonia manipud kadagiti kangrunaan nga ahensia ti gobierno, social media platforms, media organizations, ken civil society groups.
Naawis dagiti opisial manipud iti Anti-Money Laundering Council (AMLC), Bureau of Internal Revenue (BIR), Commission on Elections (COMELEC), Department of Justice (DOJ), National Bureau of Investigation (NBI), National Telecommunications Commission (NTC), ken ti Philippine National Police (PNP), a mangipaay iti pannakaawat manipud kadagiti regulatory ken enforcement measure kontra iti disinformation.
Manamnama met a tamingen dagiti pannakabagi manipud iti Google Philippines, Meta (Facebook), ken ByteDance (TikTok) dagiti pakaseknan maipapan iti akem dagiti platapormada iti panangisaknap iti di umisu nga impormasion.
Napaayaban metten dagiti social media figure a pakairamanan da Jay Sonza, Vivian Velez, Enzo Recto, ken George Ahmed Paglinawan tapno agtestigo. (Ellson Quismorio/ MANILA BULLETIN)
