Angayen ti GUMIL Filipinas, ti gunglo dagiti mannurat nga Ilokano, ti “Dap-ayan 2025: Nailian a Kombension Dagiti Mannurat nga Ilokano” inton Abril 26-27, 2025 iti Santa Teresita, Cagayan babaen ti panangsangaili ti LGU-Santa Teresita nga idauluan ni Mayor Rodrigo P. De Gracia ken iti panangiwardas ti GUMIL Cagayan, kas impakaammo ni Ariel Sotelo Tabag, presidente ti gunglo.
Babaen ti tema a “Ni Mannurat kas Mangmangged,” matratar iti dua nga aldaw a kombension dagiti nadumaduma nga aspekto ti kinamannurat ken oportunidad para kadagiti mannurat tapno ad-adda pay nga agbalinda nga epektibo a mannurat iti agduduma a kapasidadda kas makipagili iti kagimongan Ilokano.
Malaksid a ma-update dagiti mannurat maipapan iti panagsurat kadagiti nadumaduma a babasaen ken iti radio ken telebision, maidiaya kadakuada dagiti oportunidad iti panagipatarus ken no kasano a maaramat ti kinamannurat iti bukod a propesion. Maiwardas pay dagitoy no kasano ti agbalin nga epektibo a vlogger/conntent creator, autor ti libro, ken mannurat ken/wenno direktor iti pelikula.
Tampok pay iti nasao a taripnong ti pannakayalnag dagiti baro a libro nga Ilokano, pannakapadayaw dagiti nangabak kadagiti salip iti panagsuratan ken dagiti naisangsangayan a mannurat a nakaipaay iti kontribusion iti literatura nga Ilokano ken iti GUMIL Filipinas. Iti rabii ti Abril 26, agsapata dagiti baro a kameng ken opisial dagiti nadumaduma a chapter ti gunglo.
Malakanyang, impanamnamana a gatangen ti gobierno ti apit dagiti mannalon
Iti maikadua nga aldaw, maangay ti eleksion ti GUMIL Filipinas tapno mapili dagiti baro nga opisial, nga agserbi iti gunglo iti sumaruno a dua a tawen.
Kadagiti kameng ti GUMIL Filipinas ken kadagiti interesado nga agkameng, makiuman kadagiti presidente dagiti chapter maipapan iti itatabuno iti Dap-ayan 2025. (Dap-ayan Secretariat)
