Pinirmaan ni Presidente Donald Trump ti maysa nga executive order idi Marso 20 (oras iti Washington DC) a mangidardarirag iti pannakaikkat ti Departamento ti Edukasion ti U.S., kas panangtungpalna iti karina idi panawen ti kampania a mangrakrak iti maysa nga ahensia a nabayagen a puntiria dagiti konserbatibo.
Inumsi ni Trump ti Departamento ti Edukasion a kas awan serserbina wenno pagsaysayangan laeng ken rinugitan ti liberal nga ideoloha. Nupay kasta, saan a kas karina a mapasamak ti pannakarakrak ti departamento no awan tignay ti Kongreso, a nangparnuay iti departamento idi 1979. Kinuna dagiti Republikano a mangigakatda iti lehislasion tapno maragpat daytoy idinto a sidadaras met a nagtitipon dagiti Democrat a mangbusor iti nasao a plano.
Segun iti order, aramiden ti sekretario ti edukasion ti amin a kasapulan nga addang tapno maisayangkat ti maitutop ken ipalubos ti linteg tapno maiserran ti Departamento ti Edukasion ken maisubli ti autoridad iti edukasion kadagiti Estado ken lokal a komunidad.”
Iti naangay a seremonia ti panangpirma iti order, pinabasol ni Trump ti departamento a maikagapu iti panagbaba ti academic performance ti Amerika ken kinunana a nasaysayaat a dagiti Estado ti mangmanehar.
Pope Francis, nakalasaten iti peggad gapu iti pneumonia ngem adda pay laeng iti ospital
Kinuna ni Education Secretary Linda McMahon nga ikkatenna ti red tape ken pabilgenna dagiti Estado a mangikeddeng no ania ti kasayaatan para kadagiti pagadalanda. Ngem inkarina nga itultuloyna dagiti kaskenan a serbisio ken makitinnulong dagiti estado ken iti Kongreso “tapno masigurado ti nainkalintegan ken naurnos a panagbalbaliw.” (Associated Press)
