Binagaan ti ACT Teachers Party-list ni Bise Presidente Sara Duterte gapu iti panangideklarar daytoy a paset ti pagrebbengenna a mangyawid iti amana a ni dati a presidente a ni Rodrigo Duterte manipud iti Netherlands.
Impaganetget ni kandidato a Senador ti ACT Teachers Party-list a ni Rep. France Castro a ti pannakausig iti International Criminal Court (ICC) ti dati a presidente ket para kadagiti rinibu a natay bayat ti gubat ti administrasionna kontra droga.
"Isardengna koma ti aginsisingpet gapu ta ti la rantana iti pannakapaawid ti amana manipud iti ICC ket tapno saan a sungbatan daytoy kadagiti krimenna kadagiti biktima ti extra-judicial killings iti peke a drug war ken iti panag-red tag-na," kinuna ni Castro, maysa a House deputy minority leader, ita a Biernes, Marso 21.
Nakabase ti ICC iti The Hague, Netherlands. Naibalud sadiay ti dati a presidente sipud pay idi Marso 12.
China, inlibakna a nagkiddaw ni Duterte iti asylum
Binabalaw met ni dati nga ACT Teachers Rep. Antonio Tinio ti maipagarup a selective a wagas ti bise presidente a tumulong kadagiti Filipino a naibalud iti ballasiw-taaw.
"Ibagbaga ni Bise Presidente Duterte nga adda 'rebbengenna iti kailianna' a nabalud iti ICC, ngem sadino ti yan daytoy a pakaseknan ken rebbengenna para kadagiti rinibu pay a Filipino a nakabalud iti ballasiw-taaw? Adda kadi impakitana a konkreto nga panagtignay matulongan ni Mary Jane Veloso wenno dadduma pay nga OFW a naikursong iti ballasiw-taaw?" sinaludsod ni Tinio.
Kinuna ni Castro a masapul nga agtultuloy ti proceedings ti ICC tapno maited ti hustisia kadagiti biktima ti Duterte drug war.
"Saan a maiparbeng nga aglemmeng ti bise presidente iti likudan ti posisionna tapno masalaknibanna iti amana manipud iti sungsungbatan daytoy. Masapul a maipaay ti hustisia para kadagiti biktima ti gubat ti droga, ket rumbeng a mapalubosan ti panagtultuloy ti proseso ti ICC nga awan politikal a pannakibibiang," kinuna pay ni Catro. (Ellson Quismorio/MB)
