Gapu iti nakaro a panagkuestionar ni Manila 6th district Rep. Benny Abante kabayatan ti hearing on fake news and disinformation idi Biernes, Marso 21, iti House of Representatives, literal a nagsangit ken nagpigpiger dagiti pro-Duterte a social media personalities wenno vloggers.
Nagbalin a komprontasional ni Abante--a nalawag a nauman kadagiti mapapati nga awan nakaibatayanna a panangipagarup wenno panamati nga iwarwaras dagiti resource person (dagiti dimmar-ay iti hearing) iti social media--idi imparangarangna kabayatan ti hearing dagiti paskil iti social media dagiti nasao a vlogger.
Maysa a dinakamat ni Abante a mabalin a saan a ti gobierno ti talaga a "t*nga"--nga isu ti mapapati nga imbagbaga ti sumagmamano a vloggers--idi imbestigaren ti gobierno (ti napalabas a hearings ti quad-comm ti Kamara) dagiti kaso ti extra-judicial killing (EJK) iti administrasion ni Duterte.
"Itong mga vloggers na 'to, ito ang mga t*nga eh. T*tanga-t*anga ang gobyerno? Mag-isip kayo! Hindi lang sumusulat kayo ng kung anu-ano," kinuna ti diputado.
China, inlibakna a nagkiddaw ni Duterte iti asylum
"You're telling us--criminal forces? Gusto kong sabihin ngayon, publicly, ikaw ang t*nga, okay," kinuna ni Abante ken ni vlogger MJ Quiambao Reyes.
Gapu itoy, nagbalin nga emosional (nagsangit) ni Reyes ket kinunana a nainsulto iti pannakaawag kenkuana iti "t*nga."
Iti naud-udi a paset ti hearing, kinuna ni Reyes a nagsangit gapu ta mabuteng a ma-cite in contempt, a mabalin a mapasamak kenkuana no agkedked nga agpadispensar kadagiti saan a naberipikar nga ibagbagana iti online.
Impaskil ni Reyes a dagiti biktima ti EJK iti iti babaen ti administrasion ni Duterte ket "maysa a dakkel a panangallilaw" ket desperado laeng dagiti kontra-Duterte a "propagandista" a mangmanmanipular iti istoria maipapan itoy a banag.
Kabayatanna, nagsangit met ti sabali pay a resource person ken nalatak a supporter ni Duterte a ni Krizette Chu kalpasan a napangtaan a ma-cite in contempt no saan nga agpadispensar iti gobierno, nga inawaganna iti "t*nga," mainaig iti 4Ps (Pantawid Pamilyang Pilipino Program) ti gobierno.
"I will apologize, Mr. Chair, for my bad words. I apologize for my bad words, Sir. I apologize for saying the word t*nga in my post, maraming-maraming salamat," kinunana.
Binagaan ti tri-comm da Reyes, Chu, ken ti maysa pay a vlogger a ni Mark Lopez nga agpadispensarda iti publiko gapu kadagiti saan a beripikado nga ibagbagada online.
Inamin ni Lopez a maysa isuna a fake news peddler (agiwarwaras iti saan nga agpayso a damag) kalpasan nga imbatad dagiti diputado kabayatan ti hearing nga inwarwaragawag ni Lopez a nagusar ti Filipinas ti water cannon kontra China iti West Philippine Sea (WPS).
Ad-adda pay a kinastigo dagiti kameng ti Kamara ni Lopez kalpasan nga imbaga daytoy nga "aso-aso" ti Estados Unidos ni Philippine Coast Guard (PCG) Spokesman Jay Tarriela.
Kinuna ti vlogger a ti namkuatanna a nangibaga iti maipapan ken ni Tarriela ket ti "nakadidillaw unay" gapu ta dagiti proklamasion ni Tarriela ket "kapada la unay iti propaganda ti Estados Unidos maipapan iti South China Sea." (Joseph Pedrajas/MANILA BULLETIN)
