Imbutaktak ni dati a Secretary ti Presidential Communications Office (PCO) Trixie Cruz-Angeles idi Marso 21, nga adda isaysayangkat ti China a panangsanay kadagiti pro-Duterte vlogger manipud iti Filipinas.
Iti hearing nga inangay ti tri-committee (tri-comm) ti Kamara mainaig iti panagraira ti fake news ken palso nga impormasion, inimtuod ni Diputado David “Jayjay” Suarez (Quezon 2nd district) ni Cruz-Angeles maipapan iti akem ti National Radio and Television Administration (NRTA) ti China a mangsanay kadagiti media practitioner manipud iti nadumaduma a pagilian.
Imparang ni Suarez ti ladawan dagiti timmabuno iti seminar ti NRTA, a nakairamanan ni Angeles ken dadduma pay a pro-Duterte vloggers.
Inaklon ni Angeles nga ammona daytoy a programa, ken dimmar-ay iti nasao a seminar a naangay idi Mayo 23 agingga Hunio 5, 2023 iti China, ket imbaklay ti gobierno ti China ti gastosda iti panagbiahe, accommodation, ken bayad ti seminar.
China, inlibakna a nagkiddaw ni Duterte iti asylum
Kinuna ni Angeles nga inawis ida ti Embahada ti China a kadawyan a mangpilpili kadagiti makipaset iti nasao a programa.
Impaganetget ni Angeles a ponponduan ti China ti nasao a programa a mangsanay kadagiti media practitioner, agraman vloggers, ket naisuro kadakuada dagiti teknikal nga aspekto ti social media kas iti panangaramid iti short-form video kas iti reels, TikTok videos, ken abbaba a YouTube videos. (Ellson Quismoro/Manila Bulletin//Lito Hilidon/Bannawag)
