Sumarungkar ni Secretary of Defense ti Estados Unidos (US) Pete Hegseth iti Filipinas inton umay a lawas kas paset ti panangpatibker iti panagtinnulong ti dua a pagilian iti tarigagayda a siwawaya ken silulukat nga Indo-Pacific region.
Kinuna ni Sean Parnell, pannakangiwat ti Pentagon, idi Marso 21 (oras iti US), a mapan nga umuna ni Hegseth iti Hawaii ken Guam sakbay a mapan iti Filipinas.
Naikeddeng a kasarita ni Hegseth dagiti nangato nga opisial ti militar ti US ken dagiti daulo ti sibilian iti US Indo-Pacific Command iti Hawaii. Kalpasanna, mapan iti Guam tapno sarungkaranna dagiti pasilidad ti militar sadiay.
Umay ni Hegseth iti Manila inton Marso 28-29 tapno kasaritana da Sekretario ti Department of National Defense (DND) Gilbert Teodoro Jr. ken Presidente Ferdinand Marcos Jr. mainaig iti kumarkaro a tignay ti China iti West Philippine Sea ken ti posible a panangipaay ti administrasion ni Trump iti tulong iti militar ti Filipinas.
Segun ken ni Parnell, itandudo ni Hegseth ti panggepda a seguridad kadagiti daulo ti Filipinas ken kasaritada dagiti armada ti Filipinas ken US.
Proseso ti kaso nga impeachment ni VP Duterte, saan nga apektaran ti kaso ni Madriaga
Iti Japan ti sumaruno a turongen ni Hegseth tapno makipaset iti pannakarambak ti maika-80 nga anibersario ti Battle of Iwo Jima, ken kasaritana dagiti opisial ti Japan ken armada ti US sadiay. (Raymund Antonio/Manila Bulletin//Lito Hilidon/Bannawag)
