Nasurok a 8,000 a polis ti maiwaras iti Metro Manila nga agbantay kadagiti nadumaduma a lugar a pakaangayan ti welga dagiti drayber ken operator ti transportasion nga agpaut iti tallo nga aldaw manipud ita, Marso 24.
Segun ken ni Police Maj. Hazel Asilo, pannakangiwat ti National Capital Region Police Office (NCRPO), mairaman iti 8,000 a polis ti agarup 2,500 a kameng ti Civil Disturbance and Management (CDM).
Nakasagana met dagiti lugan a libre a pagluganan dagiti commuter nga awan paglugananda.
Itay nabiit, impakaammo ti grupo ti transportasion a Manibela nga isayangkatda ti tallo nga aldaw a welga kas panangsupiatda iti maipagarup a kinaulbod ti Land Transportation Franchising and Regulator Board (LTFRB) ken dadduma nga opisial ti Department of Transportation (DOTr).
Panangakseptar iti pannakawayawaya ni Duterte, kaipapananna ti panangbigbig iti hurisdiksion ti ICC iti Filipinas -- Malakanyang
Kinuna ni presidente ti Manibela Mar Valbuena a ti deklarasion ti LTFRB ken dadduma nga opisial ti DOTr iti babaen ni dati a sekretario Jaime Bautista ti nagibasaran ni Presidente Marcos a nangisayangkat iti modernisasion ti transportasion.
Gapu iti daytoy, mapapati nga adu nga operator ken drayber ti dyip ti nagbalin a biktima ti agresibo nga operasion a nagmulta manipud iti ₱2,000 agingga iti ₱50,000.
Iti maysa a press briefing, kinuna ni Valbuena nga indeklarar ti LTFRB nga adda 86 a porsiento nga operator ti nagkonsolidar kas maysa a korporasion wenno kooperatiba ngem naammuan a kagudua laeng kadakuada ti nagtungpal iti konsolidasion.
Ti konsolidasion ti umuna a paset ti modernisasion ti public utility vehicle (PUV), nga addaan itan iti maikadua a paset nga isu ti route rationalization. Inton agangay, maikkaten dagiti tradisional a dyip.
Ti maipagarup a kinaulbod ti LTFRB ti makagapu iti panagwelga ti Manibela.
Iti sabali a bangir, lima a dadakkel a transport group ti saan a nakipaset iti panagwelga ti Manibela, segun ken ni presidente ti Pasang Masda Obet Martin, ta patienda a saan a transport strike ti sungbat kadagiti parikut iti sektor ti PUV.
Mangangay ita nga aldaw, Marso 24, dagiti grupo a Pasang Masda, Altodap, ACTO, Busina, ken Curoda iti welga a panangsuportarda iti Public Transport Modernization Program (PTMP) gapu ta adun kadagiti miembroda ti nagtungpal iti konsolidasion.(Aaron Recuenco/Manila Bulletin//Lito Hilidon/Bannawag)
