Iti pannakabista ti kaso ni dati a presidente Rodrigo Duterte a crime against humanity, kiniddaw ti International Criminal Court (ICC) kadagiti prosecution ken depensa a mangidatagda iti impormasion mainaig iti disclosure process inton umay a bulan.
Naikeddeng a mangidatag ti prosecution iti detaliado a komento mainaig iti dokumentario a pammaneknek, exculpatory evidence, ken dagiti testigo iti di naladladaw ngem Abril 4 tapno maisagana para iti confirmation of charges a maangay inton Septiembre 23.
Masapul a pakaammuan ti prosecution ti Pre-Trial Chamber ti ICC ti kasapaan a petsa a pannakaidatagda kadagiti dokumento tapno maikkan iti umdas a panawen ti depensa nga agsagana.
Iti sabali a bangir, naikkan dagiti kameng ti depensa iti gundaway a mangidatag iti komento maipapan iti impormasion nga indatag ti prosekusion, agraman dagiti saludsod mainaig iti panggep ni Duterte a panangusar iti ebidensia ken testigo.
Panangakseptar iti pannakawayawaya ni Duterte, kaipapananna ti panangbigbig iti hurisdiksion ti ICC iti Filipinas -- Malakanyang
Naibilin iti ICC Registry a mangidatag iti paliiwda mainaig iti pannakipaset dagiti biktima iti kaso agingga iti Abril 2. (Raymund Antonio/Manila Bulletin//Lito Hilidon/Bannawag)
