Agsansanay ti sumagmamano a yunit ti Philippine Army (PA) a mangusar ken mangmantener iti nabileg a Typhon mid-range capability (MRC) missile system, kinuna ti maysa a nangato nga opisial ti Army ita nga aldaw, Marso 25.
Kabaelan ti Typhon MRC, a partuat ti Lockheed Martin iti Amerika, ti mangipugso iti adu a missile kas iti Standard Missile 6 (SM-6), a nairanta a pangraut manipud iti tangatang wenno iti baybay iti kaadayo a 200 a kilometro, kasta met ti Tomahawk Land Attack Missile (TLAM), a makakabael mangpunta kadagiti adda iti adayo a puntiria.
Ngem saan nga impalnad ni pannakangiwat ti PA Col. Louie Dema-ala no mano ti soldado nga agsansanay para iti Typhon.
Itay nabiit, impakaammo ni daulo ti Armed Forces of the Philippines (AFP) General Romeo Brawner Jr. nga interesado ti militar a gumatang iti Typhon MRC tapno mapapigsa ti panangdepensa ti pagilian kadagiti kabusor.
Mabalin a matulongan nga agawid dagiti Filipino a naawanan iti trabaho gapu iti ginggined iti Myanmar -- DFA
Maawat manipud iti 3rd Multidomain Task Force ti US Army a nakabase iti Hawaii ti Typhon battery ita a tawen. Maikadua daytoy nga iseserrek ti MRC iti rehion ti Pasipiko.
Simrek ti immuna a battery ti Typhon MRC iti Filipinas bayat ti pannakaangay ti Salaknib Exercise ti PA ken ti Balikatan Exercise ti AFP idi Abril 2024. Saan pay nga innala ti US ti nasao a missile battery sipud idi.
Iti biang ti AFP, siaayatda mangawat iti kaadda ti nayon a Typhon MRC battery iti Pacific region. (Martin Sadongdong/Manila Bulletin//Lito Hilidon/Bannawag)
