Bayat ti yaadani ti panagbobotos, pinapigsa ni agngayangay a senador Camille Villar ti panagkampaniana iti Siudad ti Caloocan - maysa kadagiti siudad a kaaduan ti botantena iti amianan ti Metro Manila - babaen ti motorcade kaduana ni Diputado ti Caloocan Oscar “Oca” Malapitan.
Inarak dagiti tao ti motorcade da Villar ken Malapitan a nagturong kadagiti dadakkel a barangay manipud iti City Hall agingga iti historikal a Monumento Circle, ket inawat ida dagiti residente ken supporters-da.
Iti pannakisaritana kadagiti local leader, impaganetget ni Villar ti kinapateg ti pannakaitandudo ken pannakapabileg dagiti agtutubo, ken inawisna dagiti komunidad a mangpadakkel iti timek dagiti agtutubo iti panangituray.
"Masapul a paset ti nasional a saritaan dagiti agtutubotayo - saan laeng a kas dadaulo iti masanguanan, no di ket kas aktibo a makipaset iti agdama,"kinuna ni Villar, ti kaubingan a kandidato para senador iti eleksion a maangay inton Mayo 12, 2025.
BRP Gabriela Silang, nagturong iti 3 a pagilian ti ASEAN
Inlanad ni Villar dagiti paglintegan a gandatna nga idatag a nakasentro iti polisia a nakasagana iti masakbayan, a mangipangngruna iti digital economy, financial literacy, ken entrepreneurship -- nangruna kadagiti agkabannuag nga umili.
Iti nakurang a dua a bulan sakbay iti aldaw ti eleksion, agtultuloy latta ni Villar nga agkampania iti Camanava (Caloocan, Malabon, Navotas) area. Itay nabiit, sinarungkaranna dagiti tiendaan iti deppaar ti Camarin tapno makilangen kadagiti residente tapno mapapigsana ti suporta manipud iti baba.
Ti CAMANAVA blitz ket paset ti nalawlawa a kampania ni Villar tapno mayam-ammona ti sirmatana a nakasagana iti masanguanan a panangituray kadagiti Filipino a komunidad.
