Nadoble ti cash incentives nga ipapaay ti Mariano Marcos State University (MMSU) kadagiti topnotcher kadagiti licensure examination tapno mabigbig ti kinapinget ken kinasaetda.
Iti babaen ti Resolution 20, series of 2025 ti Board of Regents ti unibersidad, makaawat itan iti ₱100,000 dagiti estudiante a makayalat iti umuna a ranggo iti licensure ken board examinations. Ngimmato daytoy iti ₱50,000 manipud idi 2021.
Nanayonan met laeng ti insentibo a maited kadagiti dadduma pay a topnotcher, kas sumaganad: Top 2 agingga iti 3: ₱80,000; Top 4 agingga iti 5: ₱60,000; ken Top 6 agingga iti 10: ₱40,000.
Resulta ti adjustment ti benchmarking kadagiti state universities ken colleges iti Region 1 ken Region 2 ken kadagiti unibersidad iti Filipinas nga addaan iti nangatngato nga incentive rates.
Urijah Publishing Enterprises, yalnagna ti libro ni Juan Ben Quimba iti Dap-ayan 2025 ti GUMIL Filipinas
Maibilang a pammaregta daytoy tapno agregget pay ken magunggonaan dagiti estudiante a mangipaay iti maipannakkel a nagapuanan ken pammadayaw iti komunidad ti MMSU. (MMSU Facebook Page)
