Inlibak ti pannakangiwat ti Chinese Foreign Ministry a ni Guo Jiakun a ginandat ni dati a presidente Rodrigo Duterte ti agkiddaw iti pagkamangan wenno asylum iti China ngem saan a napatgan, sakbay a naarestar daytoy babaen ti International Criminal Court (ICC) warrant para iti crimes against humanity of murder.
“Kayatko nga iparangarang a pribado a panagbakasion ti panagbiahe ni Mr. Duterte iti Hong Kong,” kinuna ti opisial iti press conference-na idi Marso 24.
“Dimi pulos ti naaw-awat ti maibagbaga nga aplikasion para iti asylum iti gobierno ti China manipud ken ni dati a presidente Rodrigo Duterte wenno ti pamiliana,” innayonna.
"Inanamaenmi a naan-annad koma dagiti tattao manipud iti media maipapan iti makunkuna nga 'impormasion manipud kadagiti source,' a mabalin nga awan ti nakaibatayanna wenno addaan dakes a motibo, ken saanda koma a nalaka a mamatpati iti mangmangngegda," kinuna ni Gou.
Grupo dagiti mannursuro, nagkiddaw iti pannakaipatungpal ti 'teacher-friendly' nga iskediul iti SY 2025-2026
Segun kadagiti report, ginandat ti dati a presidente ti agkiddaw iti pagkamangan iti China, ngem napagkedkedan isu a napilitan a nagawid daytoy iti Manila, a nakaarestaranna gapu iti ICC warrant nga impatungpal ti International Criminal Police Organization (Interpol) ken ti Philippine National Police (PNP).
Naibiahe kalpasanna iti The Hague, Netherlands ket adda itan a sibabalud sadiay bayat nga ur-urayenna ti pannakabistana.
Bayat ti innem a tawen a panagturayna, intandudo ni Duterte ti pannakigayyem iti China iti laksid ti kumarkaro nga agresibo a tignay ti Beijing iti West Philippine Sea.
Inumsi pay ni Duterte ti balligi ti 2016 Arbitral Tribunal a nangpaneknek a saan a balido ti 9-dash-line a pagbatbatayan ti China, ket inawaganna a maysa laeng a "pedaso ti papel" daytoy a mabalin nga ibelleng. (Raymund Antonio/MANILA BULLETIN)
