Sangapulo ket pito a pagilian iti las-ud ti 51 nga aldaw.
Dayta ti sakupen ti naituding a panagbiahe ni diputado ti Davao City 1st district Paolo Duterte, bayat a nakabalud ti amana a ni dati a presidente Rodrigo Duterte iti International Criminal Court (ICC) iti Netherlands gapu iti kaso a crimes against humanity.
Segun iti travel clearance a pinirmaan ti sekretario heneral ti Kamara a ni Reginald Velasco idi Marso 20, napalubosan ni Duterte nga agbiahe iti 17 a pagilian manipud Marso 20 agingga iti Mayo 10, 2025.
Mairaman kadagiti pagilian a papanan ni Duterte ti Estados Unidos, China, Japan, United Kingdom, Malaysia, Indonesia, South Korea, Vietnam, Cambodia, Australia, Netherlands, Germany, France, Belgium, Italy, ken Singapore.
Camille Villar indauluanna ti pannakalukat ti baro a pasdek ti Las Piñas General Hospital
Nailanad iti pinal a travel clearance a "personal" ti biahe ni Duterte ket bukodna a kuarta ti gastuenna nga agbiahe.
Nagkandidato manen a para diputado ni Duterte iti 1st District ti Davao City, ngem busbosenna ti panawen ti kampania iti ballasiw-taaw.
Segun iti maysa a source, iti pannakaisursurat daytoy a damag, adda ni Duterte iti Hong Kong, China. (Ellson Quismorio/Manila Bulletin//Lito Hilidon//Bannawag)
