Saan nga umdas para iti sumagmamano a pro-Duterte a vloggers a mangibaga iti "sorry"--nasken nga isardengda metten ti agiwaras iti kinaulbod.
Daytoy ti imbatad ni Manila 6th district Rep. Bienvenido "Benny" Abante Jr., ti kongresista a nangiganetget a masapul a dumawat iti panagpadispensar dagiti vlogger a mangibagbaga a "hoax" wenno panangal-allilaw laeng dagiti extrajudicial killing (EJKs) iti drug war, kasta met ti naiwarwaragawag a "mass resignation" dagiti polis kas resulta ti pannakaarestar ni dati a presidente Rodrigo Duterte.
Segun ken ni Abante, maysa a kongkreto nga addang ti panagkumit a mangibaga iti kinapudno tapno matarimaan ti dadael a ginubuay dagitoy a vlogger.
"Dagitoy a panagpadispensar ket pangrugian, ngem saan nga umdas dagitoy. No pudno a napasnek dagitoy a vlogger, masapul nga isardengda ti agiwaras iti kinaulbod ket rugianda nga iparang ti kinapudno--saan a ti kunkunada a ‘kinapudnoda’ no di ket ti agpayso, napudno-iti-Dios a kinapudno," kinuna ni Abante iti maysa nga statement idi Lunes, Marso 24.
BRP Gabriela Silang, nagturong iti 3 a pagilian ti ASEAN
Inruar ti kongresista ti statement-na kalpasan ti kaudian a hearing ti House tri-committee, a nangadmitiran ti maysa nga online content creator nga awan ti ebidensiana a mangsuportar iti imbagbagana a parparbo laeng dagiti EJK a naisayangkat iti administrasion ni Duterte. Kabayatan ti nasao a hearing, dinakamat ti nasao a content creator a karbenganna ti mangibaga iti “bukodko a kinapudno”, a nangtignay iti nakaro a panangtubngar ni Abante.
Idinto a dina innaganan iti statement-na, ti dakdakamaten ni Abante ket ni Mary Jane Quiambao Reyes, maysa kadagiti resource person kabayatan ti hearing.
Dinakamat met ni Abante ti sabali pay a vlogger a ni Krizette Laureta Chu, a timmabuno met iti tri-comm hearing idi Marso 21 kas resource person.
“Dimo mabalin ti aglemmeng iti likudan ti sao a ‘bukodko a kinapudno’ no ti pagsasaritaan ket ti maipapan iti panaglabsing iti karbengan ti tao. Saan a subjective ti kinapudno. Masapul a naibatay daytoy kadagiti kinapudno ken ebidensia. Ti panangawag kadagiti EJK a ‘massive hoax’ ket saan laeng nga iresponsable--insulto daytoy kadagiti biktima, kadagiti agladladingit a pamilia, ken kadagiti institusion––kas iti Kamara ken ti Commission on Human Rights––a nangimbestigar kadagitoy a krimen,” kinuna ni Abante.
Pinalagipan ni Abante, nga agserserbi a kas chairperson ti House Committee on Human Rights, dagiti social media influencer ken content creator a "ti wayawaya ti panagsao ket saanna a kayat a sawen ti wayawaya manipud iti accountability."
"No addaanka iti dakkel a plataporma, dakkel met ti responsibilidadmo. Saanmo laeng a mabalin ti agpaskil iti ania man para kadagiti likes wenno views ket ti panagkunam awanen bibiangmo iti pagbanagan dagiti impaskilmo," kinunana.
"Inadmitirda nga awananda iti dokumentasion, awananda iti solido nga ebidensia––ken agpannurayda laeng kadagiti maipaspaskil iti online. Red flags dagitoy. Iparangarang dagitoy kadatayo a saan a journalism daytoy, daytoy ket propaganda,” impaganetget ni Abante.
Kinuna ti beterano a kongresista a masapul a mangiwayat itan dagiti vlogger kadagiti addang tapno maatur dagiti kinaulbod a pinalubosanda a nagwaras.
“No pudno ti panagpadispensarda, usarenda koma ita dagiti platapormada a mangkorehir kadagiti di umisu a kapanunotan nga intandudoda. Ilawlawagda no ania ti pudno. Iladawanda no ania a talaga ti napasamak. Bigbigenda ti saem a sagsagabaen ti pamilia dagiti biktima,” kinuna ni Abante.
“Saan laeng a dagiti social media post ti pakaseknantayo. Pakaseknantayo dagiti naiwarwaras a naratibo a mangbarengbareng iti panagsagaba dagiti biktima, mangballikug iti pakasaritaan, ken mangsalaknib iti impunity,” kinunana pay. (Ellson Quismorio/MANILA BULLETIN)
