Naikkat ti security detail ni Senador Ronald “Bato” dela Rosa gapu ta saan a masarakan no yan daytoy, kinuna ti Malakanyang ita a Martes, Marso 25.
“Sadino ngamin ti yan ni Senador Bato? Makitkitatayo kadi?” sinaludsod ni undersecretary ti Presidential Communications Office (PCO) ken Palace Press Officer Claire Castro iti maysa a press briefing, idi masaludsod ti reaksionna iti imbaga ti senador nga awanen dagiti security aide-na idi simmangpet iti pagtaenganna iti Davao.
“As of the moment, diak makita isuna. Ngarud, kasano nga ipaayantayo iti seguridad, no di met agpakpakita?” innayon ni Castro.
Iti paskilna iti Facebook, kinuna ni Dela Rosa a nagboluntario dagiti retirado a polis ken soldado a mangsukat iti security detail-na nga imbabawi ti Philippine National Police.
Panagkampania dagiti lokal a kandidato, marugian ita nga aldaw
Kinuna ni Castro a saan nga isyu ti pannakaisubli ti security detail ni Dela Rosa no la ikeddengna ti agparang.
"Amangan no nagpukaw isuna. Ngarud, saan met a mabalin nga agistambay lattan dagiti security-na no awan met isuna. Siguro, no agparang isuna, saan a problema (a maisubli manen dagiti security aide-na)," kinuna ni Castro.
Iti press briefing iti Malakanyang idi Marso 20, inyebkas ni Castro ti pannakaupayna iti plano ni dela Rosa nga aglemmeng tapno maliklikanna ti posible a pannakaarestar gapu iti pannakairamanna iti drug war ni dati a Presidente Rodrigo Duterte.
Nupay kasta, kinuna ni Castro a makitinnulong ti gobierno ti Filipinas iti International Criminal Police Organization (Interpol) apaman nga agkiddaw daytoy iti tulong no mairuar ti arrest order kontra ken ni dela Rosa.
Karaman ni dela Rosa kadagiti kangrunaan a personalidad iti imbestigasion ti International Criminal Court (ICC) iti drug war nga insayangkat ni Duterte, segun iti Department of Justice (DOJ), iti press briefing iti Malakanyang idi Marso 13. (Ruth Abbey Gita-Carlos/Philippine News Agency)
