Dagiti laeng ukom ti International Criminal Court (ICC) ti mabalin a mangibilin iti pannakawayawaya ni dati a presidente Rodrigo Duterte manipud iti pannakaibaludna.
Daytoy ti imbatad ni pannakangiwat ti ICC Fadi El Abdallah iti virtual interview kenkuana idi Marso 24.
Saan a nagkomento maipapan iti petision a naidatag iti Korte Suprema ti Filipinas a mangkueskuestionar iti legalidad ti pannakaarestar ni Duterte, ngem kinuna ni El Abdallah nga adda kadagiti ukom ti ICC ti pangngeddeng no wayawayaanda ti maysa a "suspek."
Inlawlawag ni El Abdallah a masapul a maidatag kadagiti ukom ti ICC ti ania man a kiddaw a pannakawayawaya ni Duterte tapno kitaenda dagiti rason iti kiddaw sakbay a mangipaulogda iti desision.
19 nga OFW a nabalud iti Qatar, tultulongan ti gobierno ti Filipinas
Manamnama a kuestionaren ti kampo ni Duterte iti Pre-Trial Chamber ti ICC ti legalidad ti pannakaarestar daytoy iti Filipinas tapno mawaswas dagiti kaso ti dati a presidente gapu iti panaglabsing iti proseso.
Ngem kinuna dagiti eksperto iti linteg, a pakairamanan ni dati nga Associate Justice ti SC Antonio Carpio, nga ituloy latta ti ICC ti panangbistada ken ni Duterte illegal man wenno saan ti pannakaarestar daytoy.
Malaksid iti daytoy, kiddawen ti kampo ti dati a presidente ti interim release ni Duterte bayat ti panagurayna iti confirmation of charges hearing a maangay inton Septiembre 23.
Inlawlawag ni El Abdallah nga adda dagiti rumbeng a maannurot sakbay nga ipaay ti ICC ti interim release ti maysa a suspek.
Ngem segun kadagiti eksperto iti linteg, saan pay a pulos a nangted ti ICC iti interim release kadagiti suspek iti crimes against humanity. (Raymund Antonio/Manila Bulletin//Lito Hilidon/Bannawag)
