Dua a kadete manipud iti Philippine Military Academy (PMA) ti nagturpos iti prestihioso a National Defense Academy (NDA) ti Japan a nangimaldit iti “napateg a paset ti pakasaritaan” para iti PMA ken ti Armed Forces of the Philippines (AFP).
Nalasat da Cadet 1st Class Aerocadet Joshua Willie J. Ramos ken Cadet 1st Class Midshipman Jhoco D. Apal ti nainget a panagsanay a pakairamanan ti pannakaipasungalngalda kadagiti aktibidad dagiti kadete iti panawen ti nakaro a lam-ek, ken iti biag ti estudiante iti ganggannaet a pagadalan, kas kinuna ni Major Clive Lebin, acting chief ti PMA public affairs office.
“Iti laksid dagiti parikut iti lengguahe ken kultura, impaneknekda ti bukodda a kabaelan a maipatas kadagiti kadete a Hapones ken kadagiti padada a naggapu kadagiti sabsabali pay a pagilian. Irepresentar ti kaadda dagitoy kadete a Filipino iti NDA ti pannakitakunaynay ti Filipinas kadagiti internasional a panagkakadua iti benneg militar,” kinuna ni Lebin itoy nga aldaw, Mierkoles, Marso 26.
Naangay ti seremonia ti panagturpos idi Marso 22 iti JNDA iti Yokosuka City, Kanagawa Prefecture nga inatendaran da Japanese Prime Minister Shigeru Ishiba, Japanese Defense Minister Gen Nakatani, Japan Self-Defense Forces (JSDF) Chief of Staff Yoshihide Yoshida, ken dadduma pay a nangangato ti ranggona nga opisial militar manipud iti Japan.
19 nga OFW a nabalud iti Qatar, tultulongan ti gobierno ti Filipinas
Kuna ti PMA nga agpaay ti kaadda da Ramos ken Apal iti NDA a kas “addang iti nabilbileg pay a panagtinnulong ti Filipinas ken Japan iti tay-ak ti seguridad.”
Kalpasan ti panagturposda, nag-courtesy visit ken exit call da Ramos ken Apal ken ni Christian L. De Jesus, Deputy Chief of Mission (DCM) iti Philippine Embassy iti Japan, idi Marso 24, a nakapadayawanda iti naballigi a pannakaileppasda ti panagbasada iti NDA.
Kas kuna ni PMA, sisasaganada da Ramos ken Apal nga agserbi iti Philippine Air Force (PAF) ken Philippine Navy (PN), kas panagsaganadda, kalpasan ti panagturposda iti NDA.
Agipatpatuloden ti PMA kadagiti kadete iti NDA sipud pay iti 1996 para iti cadetship training dagitoy.
Napateg daytoy a panagsanay ken panagsisinnukat kadagiti opisial militar ken empleado a kas paset ti pannakapapigsa ti panagsinnaranay ti Filipinas ken Japan iti tay-ak ti seguridad. (Bannawag News Team)
