Ita a katiboken ti kampania, nakaala ni Camille Villar a kandidato iti kina-Senador iti suporta manipud iti Siudad ti Caloocan. Inyerdorso daytoy da Diputado Oscar Malapitan ken ti anakna a ni Mayor ti Caloocan City Along Malapitan.
Bayat ti panagtitipon dagiti lokal nga opisial ken dagiti supporters dagitoy iti Orient Pearl Seafood Restaurant iti 10th Avenue, imbunannag dagiti nasao a Malapitan ti suportada ken ni Villar, gapu iti nabayagen a panangsupsuportarna met iti siudad ken iti kinapudnona iti serbisio publiko.
Kuna ni Diputado Malapitan, nga agpailayon manen a diputado iti umuna a distrito ti Caloocan, a nabayagen a kaduada ti Pamilia Villar iti tay-ak ti panagserbi, isu nga agtalekda unay ken ni Camille. Segun iti daytoy, adu ti naitulonda iti siudad isu a tiempo metten nga agsubad dagiti Malapitan.
Kinanunongan met ni Mayor Malapitan, nga agpailayon met a mayor para iti maikadua a termino, ti sinao ti amana, a nagkunaanna a nalaka nga asitgan ni Camille, ken maysa a kita ti agserserbi a dumngeg iti makuna dagiti umili ken mangtungpal iti karina.
19 nga OFW a nabalud iti Qatar, tultulongan ti gobierno ti Filipinas
Agpada dagiti Malapitan ken Villar a kameng ti Nacionalista Party.
Iti met biang ni Villar, nagyaman kadagiti Malapitan ken inkarina nga idur-asna dagiti linteg a mangitandudo kadagiti agtutubo, karbengan dagiti babbai, ken pagimbagan ti kagimongan. Kunana a pakaidayawan ken pakaragsakanna ti panagtalek ti Pamilia Malapitan ken dagiti umili ti Caloocan. Inkarina nga igaedna ti amin tapno agbalin a timek dagitoy iti Senado.
Babaen ti nasurok a 700,000 a rehistrado a botante, maibilang ti Caloocan a kangrunaan a pagbabakalan iti daytoy Eleksion 2025. Babaen ti pannakikammaysa ni Villar kadagiti maibilang a kabilegan iti nasao a siudad, mapapati a dakkel a pagrubuatanna iti amianan a Kamanilaan.
